Foto: Azattıq radiosı.

Bügin Parlament Qazaqstannıñ aqparat jäne kommunikaciya mäseleleri boyınşa keybir zañnamalıq aktilerine özgertuler men tolıqtırular engizu turalı zañ jobasın qabıldadı. Osığan baylanıstı Parlamentte qabıldanğan BAQ turalı zañğa engen özgeristerge qısqaşa toqtalsaq.

Jeltosqan ayınıñ 21-i küni Parlament Senatı aqparat jäne kommunikaciya ministri Däuren Abaevtıñ sözimen aytqanda «barşa qazaqstandıq BAQ ökilderi qoldağan» zañ jobasın eki oqılımda qabıldadı. Jalpı BAQ turalı zañğa 280 tolıqtıru men özgertu engizu wsınılğan. Atalmış zañ jobasın osıdan bir ay bwrın qaraşa ayınıñ 22-si küni parlamenttiñ tömengi palatası Mäjiliste bir auızdan maqwldağan. Maqwldaudan aldına jan salmaytın halıq qalaulıları BAQ turalı zañdı da süt pisirim uaqıtta qabıldap tastadı. Su jaña özgertuler men tolıqtırular engizilgen zañ jobası demeseñ, sırtınan qarağanda bwrınğı BAQ turalı zañ. Biraq özgertuler men tolıqtırulardan keyin qazaq jurnalisteri zañ boyınşa, osıdan bılay qanday da bir adamnıñ jeke basına (onıñ otbasına, bank derekterine, dünie-mülkine) qatıstı mälimetterdi tek onıñ rwqsatımen ğana jariyalay aladı. Bir sözben aytqanda jemqorlıq jayında jazğıñ nemese aytqıñ kelse, sol adamnan barıp «sizdiñ qanşa qarjı jımqırğandığıñız jayında jazuğa, aytuğa bola ma?» dep rwqsat swraysıñ. Öte külkili ärine. Biraq wzaq külkiden ölip ketuge de bolatının eskergen jön. Eger de prezident mäjilis pen senat maqwldağan zañğa qol qoyatın bolsa, onda onsızda «ölim auızında jatqan» qazaq jurnalistikası men söz bostandığı bir jolata jasandı jolmen tınıs alu rejimine ötedi.

Alayda «silekeylengen süyekke» üyir BAQ ökilerine aspannan tas jausa da bäribir. Nege deysizder ğoy? Öytkeni däl osı zañ qabıldanudan bir kün bwrın barşa BAQ wjımdarınıñ redaktorları Astanada ötken Kültöbeniñ basındağı kezekti jiınğa jinalıp, qazaq sayttarın damıtu jayında äñgime qozğadı. Olarğa Parlamentte qabıldanıp jatqan zañ, oğan engen özgertuler men tolıqtırulardıñ eşqanday qatısı joq. Sebebi olar qazaq sayttarın damıtuı kerek. Bwl wlı iste BAQ turalı zañmen bas qatıruğa bolmaydı. Kelesi tenderdiñ, memlekettik jobalardıñ, sıylıqtardıñ, bayqaulardıñ qamın qazirden bastap oylay beru kerek. Biraq olardı da tüsinuge boladı. BAQ turalı zañdı qaytedi? Ata Zañı apta sayın bolmasa da «kün kösemder» qalağan uaqıtta auısa salatın elde twrıp jatırmız ğoy qanşa degenmen. Jä, wlı istermen ğana aynalısıp üyrengen adamdardı jılı jauıp qoyayıq. Odan da BAQ turalı zañğa bwdan özge qanday özgertuler men tolıqtırular engendigi jayına äñgime qozğayıq.

Bwdan bölek eski emes «jañalau» BAQ turalı zañ boyınşa, osıdan bılay kez kelgen memlekettik organ jurnalistiñ saualına 7 künniñ işinde jauap beruge mindetti. Ayta ketetin bir jayt, eski zañ boyınşa, jurnalistiñ saualına memlekettik organdar 3 kün işinde jauap berui tiis bolğan. Biraq 3 kün uaqıt qazaq atqaminerlerine az bolıp körindi me, joq älde jurnalisterge bir apta dayındalıp, tolıqqandı jauap bereyik dedi me belgisiz. Äyteuir jauap jazuğa 7 kün jetedi dep qısqa qayırıptı. Bwnıñ aldında kez kelgen jurnalistiñ saualına 15 künniñ işinde jauap beremiz degen edi. Biraq bwl jolı ol oylarınan aynıp, 7 künge qısqartıptı. Bwl aqparat jäne kommunikaciya ministrliginiñ kimmen aqıldasıp şeşken şeşimi ekendigi bizge belgisiz. Bir belgilisi aqparat jäne kommunikaciya ministrligi memlekettik organdar eşkimniñ aldında jauap bergisi kelmeytindigin BAQ turalı zañğa engizgen osı bir özgertuleri men tolıqtıruları arqılı anıq añğarttı. Ne de bolsa uaqıt körseter. Prezident bwl zañ jobasına qol qoya ma, joq pa barlığı soğan baylanıstı.

“The Qazaq Times”