Saud Arabiyasınıñ taq mwrageri auqımdı reformalardı jüzege asırmaq

Saud Arabiyası 35 jıldan beri tıyım salınğan kinoteatrlardı qayta iske qosatının jariyaladı. Eldegi islam dindarlarınıñ qısımımen Saud Arabiyasında 80-şi jıldarı barlıq kinoteatrlarğa şekteu qoyılğan. Eldiñ taq mwrageri Mwhammed bin Salman jaqında kinoteatrlardıñ qayta aşılatının mälimdedi. Bwl turalı BBC-diñ resmi saytı habarladı.

Saud Arabiyası 2030 jılğa deyin elde 300-den asa kinoteatrlardı aşudı josparlap otır. Bwğan ükimet tarabınan 24 mln AQŞ dolları köleminde qarajat bölinbek. 300-den asa kinoteatrlarda 2 mıñ kino zal bolmaq, olarğa 30 mıñnan asa jwmısşı tartılatını Saud Arabiyası ükimetiniñ mälimdemesinde aytıldı.

Saud Arabiyasınıñ patşa äuleti jäne dini instituttar uahabizm dep tanılğan dini ağımdı qoldaytındıqtan, bwl elde jürip-twrudan tartıp, kiim kiinuge deyin qatañ qadağalauğa alınğan. Qatañ tıyımdardıñ basım köbi eldegi äyelderge qaratılğan. Degenmen, soñğı jıldarı Saud Arabiyasında birqatar bilik tarabınan qadağalanatın qısımdar men şekteuler alınıp tastaluda. Osıdan bwrın atalğan elde äyelderdiñ kölik jürgizuine jäne sporttıq şaralarğa baruına rwqsat berildi.

Saud Arabiyasınıñ taq mwrageri Mwhammed bin Salman 2030 jılğa deyin elde auqımdı reformalardıñ jasalatının aytıp keledi. Onıñ aytuınşa, bwl reformalar Saud Arabiyası ekonomikası men qoğamdıq jağdaylarında ülken bwrılıstar jasamaq.

“The Qazaq Times”