Saud Arabiyasında «äl-Kaida» terrorlıq wyımınıñ basşısı bolğan Usama ben Ladenniñ inisi Bakr twtqındaldı – dep habarlaydı Reuters aqparat agenttigi.

Reuters mälimetinşe, Saud Arabiyasında Binladin qwrılıs kompaniyasınıñ basşısı Bakr ben Laden para aldı degen ayıppen qamauğa alınğan. Ben Laden otbası wzaq jıldardan beri Saud Arabiyası koroliniñ otbasımen jaqın qarım-qatınasta bolğan. Sebebi osı uaqıtqa deyin Saud koroliniñ otbasılıq qarjısın Saudi Binladin Group qadağalap kelgen.  1967 jılı Usama ben Ladenniñ äkesi Mohammed äue apatınan köz jwmğannan keyin, atalmış kompaniyanı Salem ben Laden basqarğan. Qazirgi tañda kompaniyağa Salemnıñ inisi Bakr ben Laden ielik etude.

Esteriñizge salayıq, qaraşa ayınıñ 5-si küni Saud Arabiyası koroli Salman ben Abdel Aziz äl-Saud jemqorlıqpen küres jayında jarlıq şığarğan. Osıdan keyin el boyınşa korol' otbasınıñ 11 müşesi men bwrın ministr qızmetin atqarğan 10 adam qamauğa alınğan. Biraq şeteldik sarapşılar bwnıñ barlığı jemqorlıqpen küres emes, taqqa talas kezindegi bilik basındağı artıq adamdardı korol' mañınan alastatu degen bağa berude.

 “The Qazaq Times”