Foto: Nur.kz

Qazaqstanda tauarlar eksportı 2016 jılğı 9 aydağı wqsas körsetkişpen salıstırğanda 31,1%-ğa nemese 8,3 mlrd AQŞ dollarına wlğayıp, 35,1 mlrd AQŞ dolların qwradı. QR Wlttıq bankiniñ mälimetinşe,  mwnay jäne gaz kondensatı eksportınıñ qwnı 36,6%-ğa, qara jäne tüsti metaldar eksportı tiisinşe 59,1%-ğa jäne 20,9%-ğa östi.

Tauarlar importı 15,6%-ğa wlğayıp, 23,1 mlrd AQŞ dolları boldı. Importtıñ ösimi negizgi tauar nomenklaturasınıñ barlıq toptarı boyınşa boldı. Eñ köp wlğayu azıq-tülikke jatpaytın twtınu tauarların jäne aralıq önerkäsiptik twtınu tauarların äkelu boyınşa orın aldı. Nätijesinde sauda balansınıñ oñ sal'dosı 77%-ğa ösip, 12 mlrd. AQŞ dolları boldı.

Şeteldik tikeley investorlarğa kiristerdi töleu 1,5 esege ösui saldarınan investiciyalıq kirister balansınıñ teris sal'dosı 2017 jılğı 9 ayda 12,3 mlrd AQŞ dolların qwradı. Şeteldik tikeley investorlar bwl kiristerdiñ jartısınan astamın Qazaqstandağı enşiles käsiporındarına
qayta investiciyaladı.

Qarjı şotı boyınşa kapitaldıñ taza äkelinui (Wlttıq Banktiñ rezervtik aktivterimen operaciyalardı qospağanda) aldın ala bağalau boyınşa 6,6 mlrd AQŞ dolların qwradı.

Wlttıq banktiñ mälimetinşe, şeteldik tikeley investiciyalar (ŞTI) boyınşa kapitaldıñ taza äkelinui 3,3 mlrd bolğan. Qazaqstandıq käsiporındar ağımdağı jılğı 3-toqsanda jürgizgen, ülestes twlğalar aldındağı firmaaralıq bereşekti öteu boyınşa aytarlıqtay tölemder ŞTI taza äkelinuiniñ qısqaruına ıqpal etti.

Portfel'dik investiciyalar boyınşa kapitaldıñ taza äkelinui 8,4 mlrd. dollar boldı, bwl rezidentterdiñ şeteldik bağalı qağazdarğa ornalastırılğan aktivteriniñ tömendeui, sonday-aq banktik emes sektordıñ kapitaldıñ halıqaralıq narıqtarında euroobligaciyalar
şığaruı esebinen boldı.

Basqa investiciyalar boyınşa qarjı resurstarınıñ elden äketilui köp jağdayda rezidentterdiñ şeteldik şottardağı qısqa merzimdi aktivteriniñ ösuine baylanıstı boldı.

Rezervtik aktivter (QR Wlttıq qorınıñ aktivterin eseptemegende) 2017 jılğı 1 qazandağı jağday boyınşa 32,2 mlrd AQŞ dollarına (jıl basında 29,5 mlrd AQŞ doll) bağalandı, bwl qazaqstandıq tauarlar men qızmetter importın 9,1 ay qarjılandırudı qamtamasız etedi.

“The Qazaq Times”