«Eyr Astana» äue kompaniyasında qazaqstandıq kadrlar tapşı

"Eyr Astana" äue kompaniyasında wşqıştar, injenerler, mehanikter, bortserikter jäne jolauşılarğa qızmet körsetetin agentter tapşı.Osığan baylanıstı kompaniya Qazaqstan boyınşa ümitkerlerdi irikteu, jwmısqa alu jäne dayındau maqsatında «Armanıñdı iske asır» nauqanın bastadı. Bwl turalı "Eyr Astana" AQ prezidenti Piter Foster mälimdedi. 

Qazirgi uaqıtta äue kompaniya ştatında 5000 adam bar. Al jaña qızmetkerlerdi qızmetke alu - aldağı on jılda flottı 31 äue laynerinen 64-ke deyin köbeytu maqsatımen baylanıstı bolıp otır. 2020 jılğa deyin ştattı 11%-ğa köbeytu josparlanğan.

"Qazaqstanda 18 mln ğana halıq bar. Al bwl äue kompaniyanıñ halıqaralıq deñgeydegi ambiciyaların qoldauda tım kişkentay narıq. Alayda Qazaqstannıñ artıqşılığı sol älemniñ iri narıqtarına - Qıtayğa, Ündistanğa, Reseyge jäne jaqın şetelderge jaqın ornalasqandığında. Sondıqtan nätije osı narıqtağı sätti bastamalarmen baylanıstı. Al onı odan äri damıtu üşin aldımen bilikti mamandar qajet", - dedi ol Almatıda ötken baspasöz konferenciyasında.

Onıñ sözinşe, kompaniya qajetti wşqış mamandardı ab-initio bağdarlaması boyınşa Ispaniya men Irlandiyada, al bortserikterdi Germaniyada, Wlıbritaniyada jäne Qazaqstanda dayındaydı eken.

"Biz 2018 jıldan bastap Astana qalasındağı özimizdiñ injenerlik-tehnikalıq ortalığımızda aviatehnikterdi oqıtudı bastaymız. Osılayşa, biz qızmetkerlerdiñ jetispeuşiligin toltırıp qana qoymay, qazaqstandıq jastar men bedeldi mamandardı tärbieleu arqılı özimizdiñ äleumettik jauapkerşiligimizdi körsetemiz», - dedi Piter Foster.

Bwdan bölek aviaciyağa qajet mamandardıñ biri  bortserikter bolıp otır. Kompaniyanıñ mälimetinşe, qazirgi kezde äue kompaniyada 1120 bortserik qızmet atqaradı eken. Al olarğa qoyılatın talaptar mınaday: 3 til biletin (qazaq, orıs jäne ağılşın tili - red.), tötenşe nemese dağdarıs jağdayında jwmıs istey alatın ümitkerler boluı kerek. Bwdan bölek äue kompaniyanıñ prezidenti mamandardıñ densaulığına da naqtı talaptar qoyılatının atap ötti.

Al "Eyr Astana"-nıñ qızmetkerlerdi basqaru jäne äkimşilik mäseleler jönindegi vice-prezidenti Evgeniya Ni bolsa äue kompaniyağa jwmısqa kelgenderdi oqıtu tolığımen kompaniya esebinen bolatının atap ötti.

"Oqıtu tolığımen äuekompaniya esebinen jüzege asırıladı. Oqudı bitirgen ümitkerlerge halıqaralıq sertifikattar men licenziyalar beriledi. Al "Eyr Astana" äuekompaniyasındağı barlıq emtihandardan sätti ötkennen keyin jwmısqa ornalasuğa kepildik beriledi. Biz mektep oquşıları men studentterdi jäne ata-analardı aviaciyalıq mamandıqtarğa nazar audaruın swraymız", - dedi ol.

“The Qazaq Times”