«ەير استانا» اۋە كومپانياسىندا قازاقستاندىق كادرلار تاپشى

"ەير استانا" اۋە كومپانياسىندا ۇشقىشتار، ينجەنەرلەر، مەحانيكتەر، بورتسەرىكتەر جانە جولاۋشىلارعا قىزمەت كورسەتەتىن اگەنتتەر تاپشى.وسىعان بايلانىستى كومپانيا قازاقستان بويىنشا ۇمىتكەرلەردى ىرىكتەۋ، جۇمىسقا الۋ جانە دايىنداۋ ماقساتىندا «ارمانىڭدى ىسكە اسىر» ناۋقانىن باستادى. بۇل تۋرالى "ەير استانا" اق پرەزيدەنتى پيتەر فوستەر مالىمدەدى. 

قازىرگى ۋاقىتتا اۋە كومپانيا شتاتىندا 5000 ادام بار. ال جاڭا قىزمەتكەرلەردى قىزمەتكە الۋ - الداعى ون جىلدا فلوتتى 31 اۋە لاينەرىنەن 64-كە دەيىن كوبەيتۋ ماقساتىمەن بايلانىستى بولىپ وتىر. 2020 جىلعا دەيىن شتاتتى 11%-عا كوبەيتۋ جوسپارلانعان.

"قازاقستاندا 18 ملن عانا حالىق بار. ال بۇل اۋە كومپانيانىڭ حالىقارالىق دەڭگەيدەگى امبيتسيالارىن قولداۋدا تىم كىشكەنتاي نارىق. الايدا قازاقستاننىڭ ارتىقشىلىعى سول الەمنىڭ ءىرى نارىقتارىنا - قىتايعا، ۇندىستانعا، رەسەيگە جانە جاقىن شەتەلدەرگە جاقىن ورنالاسقاندىعىندا. سوندىقتان ناتيجە وسى نارىقتاعى ءساتتى باستامالارمەن بايلانىستى. ال ونى ودان ءارى دامىتۋ ءۇشىن الدىمەن بىلىكتى ماماندار قاجەت", - دەدى ول الماتىدا وتكەن ءباسپاسوز كونفەرەنتسياسىندا.

ونىڭ سوزىنشە، كومپانيا قاجەتتى ۇشقىش مامانداردى ab-initio باعدارلاماسى بويىنشا يسپانيا مەن يرلانديادا، ال بورتسەرىكتەردى گەرمانيادا، ۇلىبريتانيادا جانە قازاقستاندا دايىندايدى ەكەن.

ء"بىز 2018 جىلدان باستاپ استانا قالاسىنداعى ءوزىمىزدىڭ ينجەنەرلىك-تەحنيكالىق ورتالىعىمىزدا اۆياتەحنيكتەردى وقىتۋدى باستايمىز. وسىلايشا، ءبىز قىزمەتكەرلەردىڭ جەتىسپەۋشىلىگىن تولتىرىپ قانا قويماي، قازاقستاندىق جاستار مەن بەدەلدى مامانداردى تاربيەلەۋ ارقىلى ءوزىمىزدىڭ الەۋمەتتىك جاۋاپكەرشىلىگىمىزدى كورسەتەمىز»، - دەدى پيتەر فوستەر.

بۇدان بولەك اۆياتسياعا قاجەت مامانداردىڭ ءبىرى  بورتسەرىكتەر بولىپ وتىر. كومپانيانىڭ مالىمەتىنشە، قازىرگى كەزدە اۋە كومپانيادا 1120 بورتسەرىك قىزمەت اتقارادى ەكەن. ال ولارعا قويىلاتىن تالاپتار مىناداي: 3 ءتىل بىلەتىن (قازاق، ورىس جانە اعىلشىن ءتىلى - رەد.), توتەنشە نەمەسە داعدارىس جاعدايىندا جۇمىس ىستەي الاتىن ۇمىتكەرلەر بولۋى كەرەك. بۇدان بولەك اۋە كومپانيانىڭ پرەزيدەنتى مامانداردىڭ دەنساۋلىعىنا دا ناقتى تالاپتار قويىلاتىنىن اتاپ ءوتتى.

ال "ەير استانا"-نىڭ قىزمەتكەرلەردى باسقارۋ جانە اكىمشىلىك ماسەلەلەر جونىندەگى ۆيتسە-پرەزيدەنتى ەۆگەنيا ني بولسا اۋە كومپانياعا جۇمىسقا كەلگەندەردى وقىتۋ تولىعىمەن كومپانيا ەسەبىنەن بولاتىنىن اتاپ ءوتتى.

"وقىتۋ تولىعىمەن اۋەكومپانيا ەسەبىنەن جۇزەگە اسىرىلادى. وقۋدى بىتىرگەن ۇمىتكەرلەرگە حالىقارالىق سەرتيفيكاتتار مەن ليتسەنزيالار بەرىلەدى. ال "ەير استانا" اۋەكومپانياسىنداعى بارلىق ەمتيحانداردان ءساتتى وتكەننەن كەيىن جۇمىسقا ورنالاسۋعا كەپىلدىك بەرىلەدى. ءبىز مەكتەپ وقۋشىلارى مەن ستۋدەنتتەردى جانە اتا-انالاردى اۆياتسيالىق ماماندىقتارعا نازار اۋدارۋىن سۇرايمىز", - دەدى ول.

“The Qazaq Times”