Kürd qarulılarınıñ qarauılı. foto: Pravda.ru.

Irak Kürdistanı biligi Bağdatpen kelissözdi bastau üşin ötken aydağı zañsız dep tabılğan referendumnan keyingi qadamdardı toqtatudı wsınıp otır. Esteriñizde bolsa referendumğa qatısuşılardıñ basım köbi Kürdistannıñ täuelsizdigin qoldap dauıs bergen edi. Bwl turalı BBC-diñ onlayn qızmeti habarladı.

Irak ükimeti Kürdistannıñ täuelsizdik jönindegi referendumına jauap beru üşin osıdan bwrın iri äskeri qadamğa barğan bolatın. Irak ükimetine qarastı äskerler Kirkuk qalasın jäne mañındağı birneşe qalanı baqılauına alıp, küşpen basıp kirgen bolatın.

Bwğan qarsı twrğan kürd qarulı küşteri men Irak ükimet armiyası arasında bolğan qaqtığıstan onnan astam adam qaza tauıp, köptegen adam jaraqat alğan. Azamattıq soğıstıñ boluınan alañdağan Kürdistan biligi kürdterge oq şığarmaudı eskertip, şeginuge ündedi.

Qazir Kürdistan biligi täuelsizdik turalı referendumğa äskeri äreketpen jauap qaytarmaq bolğan Bağdat biligin kelissözge şaqırdı. Kürd qarulı küşteri men Bağdat ükimetiniñ küşteri arasındağı qaqtığıs jalğasa berse bwdan da köp adam şığını bolatının eskertti. Qazirge deyin Bağdat biligi bwğan jauap qaytarğan joq.

“The Qazaq Times”