كۇرد قارۋلىلارىنىڭ قاراۋىلى. فوتو: پراۆدا.رۋ.

يراك كۇردىستانى بيلىگى باعداتپەن كەلىسسوزدى باستاۋ ءۇشىن وتكەن ايداعى زاڭسىز دەپ تابىلعان رەفەرەندۋمنان كەيىنگى قادامداردى توقتاتۋدى ۇسىنىپ وتىر. ەستەرىڭىزدە بولسا رەفەرەندۋمعا قاتىسۋشىلاردىڭ باسىم كوبى كۇردىستاننىڭ تاۋەلسىزدىگىن قولداپ داۋىس بەرگەن ەدى. بۇل تۋرالى BBC-ءدىڭ ونلاين قىزمەتى حابارلادى.

يراك ۇكىمەتى كۇردىستاننىڭ تاۋەلسىزدىك جونىندەگى رەفەرەندۋمىنا جاۋاپ بەرۋ ءۇشىن وسىدان بۇرىن ءىرى اسكەري قادامعا بارعان بولاتىن. يراك ۇكىمەتىنە قاراستى اسكەرلەر كيركۋك قالاسىن جانە ماڭىنداعى بىرنەشە قالانى باقىلاۋىنا الىپ، كۇشپەن باسىپ كىرگەن بولاتىن.

بۇعان قارسى تۇرعان كۇرد قارۋلى كۇشتەرى مەن يراك ۇكىمەت ارمياسى اراسىندا بولعان قاقتىعىستان وننان استام ادام قازا تاۋىپ، كوپتەگەن ادام جاراقات العان. ازاماتتىق سوعىستىڭ بولۋىنان الاڭداعان كۇردىستان بيلىگى كۇردتەرگە وق شىعارماۋدى ەسكەرتىپ، شەگىنۋگە ۇندەدى.

قازىر كۇردىستان بيلىگى تاۋەلسىزدىك تۋرالى رەفەرەندۋمعا اسكەري ارەكەتپەن جاۋاپ قايتارماق بولعان باعدات بيلىگىن كەلىسسوزگە شاقىردى. كۇرد قارۋلى كۇشتەرى مەن باعدات ۇكىمەتىنىڭ كۇشتەرى اراسىنداعى قاقتىعىس جالعاسا بەرسە بۇدان دا كوپ ادام شىعىنى بولاتىنىن ەسكەرتتى. قازىرگە دەيىن باعدات بيلىگى بۇعان جاۋاپ قايتارعان جوق.

“The Qazaq Times”