Foto: APF

Japoniyada jeksenbi küni merziminen bwrın ötkizilgen tömengi Parlament palatası saylauınıñ qorıtındısı boyınşa, Prem'er-ministr Sindzo Abeniñ koaliciyası jeñiske jetti. 2012 jılı Japoniyanıñ Prem'er-ministri bolıp saylanğan Sindzo Abe biıl üşinşi merzimge lauazımın saqtap, el tarihındağı eñ wzaq basqaruşı bolıp qalğalı twr. Bwl turalı APF aqparattıq agenttigi jazdı. 

NHK jergilikti aqparat agenttiginiñ habarlauınşa, Prem'er-ministr basqaratın Liberal-Demokratiyalıq partiya Parlamenttegi 312 orınğa ie bolğan. Sindzo Abe: "Men saylau aldında aytqan sözderime berik bolıp, Soltüstik Koreya tarapınan tuğan qauipti eñseremin. Bwl üşin qatañ diplomatiya kerek", - dedi.

Osıdan bwrın Soltüstik Koreya Japoniyanı teñiz tübine jiberuge uäde etken bolatın. Eldiñ soltüstik böligindegi Hokkaydo aralınıñ üstinen wşıp, suğa qwlağan eki birdey zımıran wşırğan. Kelesi jılğa josparlanğan saylaudıñ merziminen bwrın ötkiziletinin 25 qırküyekte jariyalağan Prem'er-ministr bwl asığıs qadamın Japoniyağa "wlttıq dağdarıs" keluimen tüsindirdi.

VVS-ge swhbat bergen sarapşı atalğan saylauda Sindzo Abeniñ partiyasına qarsı twrar basqa al'ternativ bolmağanın aytadı. Qazirgi Prem'erdiñ öz lauazımında qaluı onıñ 1947 jılı Amerika okkupanttarınıñ basşılığımen qabıldanğan Japoniya Konstituciyasın qayta qarau turalı bastamasın jüzege asıru ıqtimaldılığın arttıra tüsedi. Pacifistik (beybit mağınasında) bağıttağı Konstituciyada Japoniyağa soğıs aşuğa tıyım salınğan. Osığan deyin Japoniya äskeri quatın arttıru operaciyalarını bärin Konstituciya tarmağın bwzu emes, jay ğana qorğanıs qabiletin retteu dep kelgen edi. Biraq soñğı kezderi Sindzo Abe Konstituciyanıñ 9 bölimin özgertu turalı wsınıs bildirip jür. Saylaudan keyin ol öz oyın iske asıru üşin barınşa köp adamnıñ qoldauına ie boluğa barın salatının jetkizdi.

“The Qazaq Times”