Ündi-Tınıq mwhit aymağında qaqtığıs qateri barğan sayın artıp keledi. 21 qaraşada bastalğan Filippin teñizindegi AQŞ, Japoniya, Avstraliya, Kanada jäne Germaniya qatarlı bes el birlesken ANNUALEX–2021  attı teñiz äskeri jattığuı keşe, 30 qaraşa ayaqtadı.  

Batıs sarapşılarınıñ pikirinşe, Qıtaydıñ arta tüsken qauip-qateri osı aymaqtağı äskeri jattığulardıñ sipatın, kölemin özgertti. Tipti, aldağı uaqıtta Oñtüstik Qıtay teñizi äskeri jattığu eñ köp ötetin aymaqqa aynaluı mümkin. Bwğan ilese osı teñizdiñ «qauipsizdik temperaturası» da köterile bermek.

Qıtaydıñ jaña derjava retinde boy köteruimen, AQŞ pen onıñ Ündi-Tınıq mwhitı aymağındağı odaqtastarı jäne serikteri arasındağı äskeri-qorğanıs ıntımaqtastığı tereñdedi. Qazirgi osı atalğan geosayasi aymaqta ötetin äskeri jattığulardıñ tebini bwrınğığa mülde wqsamaydı. Aytalıq, keşe ğana ayaqtağan ANNUALEX–2021  oqu-jattığuda baylanıs taktikalıq jattığuları, süñguir qayıqtarğa qarsı soğıs, äuedegi wrıs jattığuları, teñizdegi tolıqtırular, palubadan wşu jattığuları jäne teñizdegi poziciyanı qorğau jattığuları asa joğarı deñgeyde wyımdastırılğan.

ANNUALEX jattığuları, şın mänisinde, sonau 1990 jıldardan beri jıl sayın ötkizilip keledi. Alayda, soñğı jıldardağı jattığudıñ sipatı özgerdi. Bwrınğıday qorğanıs ıntımaqtastığın tereñdetu, qorğanıs täjiribelerimen almasu ğana emes, qazirgi jattığular köbine naqtı wrıs kezindegi äskeri operaciyalarğa arnalıp jatır. Oğan qosa jattığudıñ qarjılıq şığındarı da eki esege köbeytildi.

Bwnday qarqındı äskeri qimıldar sol aymaqtağı elder üşin qauipsizdik küşteriniñ, äsirese teñiz jäne äue küşterin jedel arttıru sezimin arttırdı. Qıtayğa teñiz arqılı şektesetin nemese geografiyalıq jaqtan jaqın ornalasqan elder teñiz küşterin, zımıran quatın, äue küşterin jarısa damıtıp jatır. Tipti, aymaq elderiniñ qorğanıs byudjeti men zımıran, äskeri wşaq, äskeri kemeni damıtu procesterin zertteuşiler köp wzamay Qıtayğa jaqın şağın elderde qaru-jaraq jarısı boladı dep te boljaydı.

Qazir atalğan teñiz aydındarında jattığu ötkizetin elder tek qana sol aymaq elderimen ğana şektelip otırğan joq. Europanıñ NATO-ğa müşe, köşbasşısı elderi Germaniya, Franciya, Britaniya sekildi teñiz qojaları da aymaqta äskeri kemelerimen boy körsetude.

The Qazaq Times