فوتو: APF

جاپونيادا جەكسەنبى كۇنى مەرزىمىنەن بۇرىن وتكىزىلگەن تومەنگى پارلامەنت پالاتاسى سايلاۋىنىڭ قورىتىندىسى بويىنشا، پرەمەر-مينيستر سيندزو ابەنىڭ كواليتسياسى جەڭىسكە جەتتى. 2012 جىلى جاپونيانىڭ پرەمەر-ءمينيسترى بولىپ سايلانعان سيندزو ابە بيىل ءۇشىنشى مەرزىمگە لاۋازىمىن ساقتاپ، ەل تاريحىنداعى ەڭ ۇزاق باسقارۋشى بولىپ قالعالى تۇر. بۇل تۋرالى APF اقپاراتتىق اگەنتتىگى جازدى. 

NHK جەرگىلىكتى اقپارات اگەنتتىگىنىڭ حابارلاۋىنشا، پرەمەر-مينيستر باسقاراتىن ليبەرال-دەموكراتيالىق پارتيا پارلامەنتتەگى 312 ورىنعا يە بولعان. سيندزو ابە: "مەن سايلاۋ الدىندا ايتقان سوزدەرىمە بەرىك بولىپ، سولتۇستىك كورەيا تاراپىنان تۋعان قاۋىپتى ەڭسەرەمىن. بۇل ءۇشىن قاتاڭ ديپلوماتيا كەرەك", - دەدى.

وسىدان بۇرىن سولتۇستىك كورەيا جاپونيانى تەڭىز تۇبىنە جىبەرۋگە ۋادە ەتكەن بولاتىن. ەلدىڭ سولتۇستىك بولىگىندەگى حوككايدو ارالىنىڭ ۇستىنەن ۇشىپ، سۋعا قۇلاعان ەكى بىردەي زىمىران ۇشىرعان. كەلەسى جىلعا جوسپارلانعان سايلاۋدىڭ مەرزىمىنەن بۇرىن وتكىزىلەتىنىن 25 قىركۇيەكتە جاريالاعان پرەمەر-مينيستر بۇل اسىعىس قادامىن جاپونياعا "ۇلتتىق داعدارىس" كەلۋىمەن ءتۇسىندىردى.

ۆۆس-گە سۇحبات بەرگەن ساراپشى اتالعان سايلاۋدا سيندزو ابەنىڭ پارتياسىنا قارسى تۇرار باسقا التەرناتيۆ بولماعانىن ايتادى. قازىرگى پرەمەردىڭ ءوز لاۋازىمىندا قالۋى ونىڭ 1947 جىلى امەريكا وككۋپانتتارىنىڭ باسشىلىعىمەن قابىلدانعان جاپونيا كونستيتۋتسياسىن قايتا قاراۋ تۋرالى باستاماسىن جۇزەگە اسىرۋ ىقتيمالدىلىعىن ارتتىرا تۇسەدى. پاتسيفيستىك (بەيبىت ماعىناسىندا) باعىتتاعى كونستيتۋتسيادا جاپونياعا سوعىس اشۋعا تىيىم سالىنعان. وسىعان دەيىن جاپونيا اسكەري قۋاتىن ارتتىرۋ وپەراتسيالارىنى ءبارىن كونستيتۋتسيا تارماعىن بۇزۋ ەمەس، جاي عانا قورعانىس قابىلەتىن رەتتەۋ دەپ كەلگەن ەدى. بىراق سوڭعى كەزدەرى سيندزو ابە كونستيتۋتسيانىڭ 9 ءبولىمىن وزگەرتۋ تۋرالى ۇسىنىس ءبىلدىرىپ ءجۇر. سايلاۋدان كەيىن ول ءوز ويىن ىسكە اسىرۋ ءۇشىن بارىنشا كوپ ادامنىڭ قولداۋىنا يە بولۋعا بارىن سالاتىنىن جەتكىزدى.

“The Qazaq Times”