Foto: Reuters

Ispaniya Sotı Kataloniyanıñ täuelsizdigin qoldap, referendum wyımdastırğan eki separatisti abaqtığa japtı. Kataloniya Wlttıq Assambleyasınıñ basşısı Hordi Sançez (Jordi Sánchez) ben Omnium Cultural wyımınıñ basşısı Hordi K'yuksart (Jordi Cuixart) Ispaniyada bolğan sayasi dağdarıstı wyımdastırğanı üşin ayıptalıp otır. Bwl turalı VVS aqparattıq agenttigi jazdı. 

Kataloniya derbestigi üşin ötkizilgen referendum jeñiske jetkenimen, avtonomiya basşısı Karles Pudjemont Täuelsizdik turalı Deklaraciya qabıldaymın degen şeşimin Madridpen kelisimge kelgenge deyin eki aptağa şegergen edi. Ispaniya biligi onıñ aldına poziciyasın anıqtau boyınşa naqtı talaptar qoyıp, bir apta uaqıt bergen. Endi äli de Kataloniyanıñ jeke memleket boluın qoldaytını ne onı Ispaniyağa qarastı aumaqqa aynaldıratını jöninde soñğı ükimin jariyalamağan Karles Pudjemont öziniñ tvitter paraqşasına: "Ispaniya Kataloniyanıñ azamattıq qoğam basşıların beybit şeru wyımdastırğanı üşin türmege japtı. Ökinişke oray, bizge sayasi türmeler qayta oraldı", - dep jazdı.

Qolğa tüskenderdiñ biri Hordi K'yuksart (Jordi Cuixart) osıdan bwrın äleumettik jeli arqılı halıqqa arnağan ündeuinde: "Ümitteriñizdi üzbeñizder, Kataloniya öz bolaşağın jeñip aldı" dep jazğan bolatın. Qos birdey qoğam belsendileri sonımen qatar 20-21 qırküyekte Ispaniyanıñ resmi ökilderin Kataloniya Ükimetine kirgizbey qoyğanı üşin de kinä arqalap otır.

Osıdan bwrın referendum kezinde jergilikti policiya bölimşesi halıqtı taratuğa tırısqan Ispaniyanıñ qauipsizdik qızmetkerlerini jwmısına  kedergi keltirgeni üşin qamauğa alınğan Kataloniya policiya küşteriniñ basşısı Jozep Luis Trapero bosatıldı.

VVS-dıñ jergilikti tilşisi Kataloniyada täuelsizdikti qoldaytındardıñ arasında  jaña şerulerge şaqıru akciyası jürip jatqanın jazadı.

“The Qazaq Times”