فوتو: Reuters

يسپانيا سوتى كاتالونيانىڭ تاۋەلسىزدىگىن قولداپ، رەفەرەندۋم ۇيىمداستىرعان ەكى سەپاراتيستى اباقتىعا جاپتى. كاتالونيا ۇلتتىق اسسامبلەياسىنىڭ باسشىسى حوردي سانچەز (Jordi Sánchez) بەن Omnium Cultural ۇيىمىنىڭ باسشىسى حوردي كيۋكسارت (Jordi Cuixart) يسپانيادا بولعان ساياسي داعدارىستى ۇيىمداستىرعانى ءۇشىن ايىپتالىپ وتىر. بۇل تۋرالى ۆۆس اقپاراتتىق اگەنتتىگى جازدى. 

كاتالونيا دەربەستىگى ءۇشىن وتكىزىلگەن رەفەرەندۋم جەڭىسكە جەتكەنىمەن، اۆتونوميا باسشىسى كارلەس پۋدجەمونت تاۋەلسىزدىك تۋرالى دەكلاراتسيا قابىلدايمىن دەگەن شەشىمىن مادريدپەن كەلىسىمگە كەلگەنگە دەيىن ەكى اپتاعا شەگەرگەن ەدى. يسپانيا بيلىگى ونىڭ الدىنا پوزيتسياسىن انىقتاۋ بويىنشا ناقتى تالاپتار قويىپ، ءبىر اپتا ۋاقىت بەرگەن. ەندى ءالى دە كاتالونيانىڭ جەكە مەملەكەت بولۋىن قولدايتىنى نە ونى يسپانياعا قاراستى اۋماققا اينالدىراتىنى جونىندە سوڭعى ۇكىمىن جاريالاماعان كارلەس پۋدجەمونت ءوزىنىڭ تۆيتتەر پاراقشاسىنا: "يسپانيا كاتالونيانىڭ ازاماتتىق قوعام باسشىلارىن بەيبىت شەرۋ ۇيىمداستىرعانى ءۇشىن تۇرمەگە جاپتى. وكىنىشكە وراي، بىزگە ساياسي تۇرمەلەر قايتا ورالدى", - دەپ جازدى.

قولعا تۇسكەندەردىڭ ءبىرى حوردي كيۋكسارت (Jordi Cuixart) وسىدان بۇرىن الەۋمەتتىك جەلى ارقىلى حالىققا ارناعان ۇندەۋىندە: "ۇمىتتەرىڭىزدى ۇزبەڭىزدەر، كاتالونيا ءوز بولاشاعىن جەڭىپ الدى" دەپ جازعان بولاتىن. قوس بىردەي قوعام بەلسەندىلەرى سونىمەن قاتار 20-21 قىركۇيەكتە يسپانيانىڭ رەسمي وكىلدەرىن كاتالونيا ۇكىمەتىنە كىرگىزبەي قويعانى ءۇشىن دە كىنا ارقالاپ وتىر.

وسىدان بۇرىن رەفەرەندۋم كەزىندە جەرگىلىكتى پوليتسيا بولىمشەسى حالىقتى تاراتۋعا تىرىسقان يسپانيانىڭ قاۋىپسىزدىك قىزمەتكەرلەرىنى جۇمىسىنا  كەدەرگى كەلتىرگەنى ءۇشىن قاماۋعا الىنعان كاتالونيا پوليتسيا كۇشتەرىنىڭ باسشىسى جوزەپ لۋيس تراپەرو بوساتىلدى.

ۆۆس-دىڭ جەرگىلىكتى ءتىلشىسى كاتالونيادا تاۋەلسىزدىكتى قولدايتىنداردىڭ اراسىندا  جاڭا شەرۋلەرگە شاقىرۋ اكتسياسى ءجۇرىپ جاتقانىن جازادى.

“The Qazaq Times”