Foto: kommersant.ru

Auğanstannıñ Prezidenti Aşraf Ğani VVS aqparattıq agenttigine bergen eksklyuzivti swhbatında Talibandarğa qarsı kürestiñ bolaşağı turalı äñgimelep, eldiñ aldında twrğan negizge mindetter men qaterlerdi sanamalap berdi. 

Aşraf Ğani öz äñgimesin "Älemdegi eñ jaman jwmıs -meniñ enşimde" deuden bastadı. Auğanıstan Prezidentiniñ olay deuine äbden negiz bar. Qazir 16 jıldan beri soğıs alañına aynalğan memlekettiñ aldında köptegen sın-qaterler men birinşi kezekte şeşudi qajet etetin mindetter twr. Olardıñ eñ mañızdısı - qauipsizdik. NATO äskeri Auğanstan jerinen ketkeli 3 jıl uaqıttıñ işinde Talibandıqtarğa qarsı soğıstı el äskeri özi jürgizip keledi. Auğanstanda qalğan 14 mıñğa juıq NATO äskeri olardı soğıs tärtibine üyretumen, oqıtumen, qoldau körsetumen aynalısadı. Aşraf Ğani bwl turalı: "Bwl 12 jasar balanıñ moynına 30 jastağı er azamattıñ mindeti jüktelgenge wqsaydı. Degenmen bwl bizdi qataytıp, erte eseytti" , - deydi.

Köptegen äskeri sarapşılar Auğanstannıñ  talibandıqtarğa qarsı özi jeke dara jürgizgen küresine nebäri 3 jıl bolğanın jäne bwl nätije kütuge erte kezeñ ekenin aytadı. Aşraf Ğani aldağı tört jıldan keyin NATO-nıñ qoldauın qajet etpeytin deñgeyge köteriletinine senedi. Ol Talibandıqtardıñ Ükimetti qwlatıp, eldi qaytadan böliske salu turalı oyları jüzege aspağanın alğa tartadı. Degenmen AQŞ-tıñ keltirgen derekterine qarağanda, qazir Auğanstan biliginiñ qol astına qaraytın aumaq barlıq territoriyanıñ üşten eki böliginen de az. Sonımen qatar ötken jılı Auğanstan äskeri öz quatınıñ 10 payızın joğalttı. Bwl 7 mıñ äskerdiñ soğıs alañında jan tapsırıp, tağı 12 mıñ azamattıñ jaraqat aluımen baylanıstı.

Aşraf Ğani Batıs elderi Auğanstandağı qaqtığıstıñ mänin tüsinbeydi dep esepteydi. "Bizde barlığı oylağanday azamattıq soğıs emes, esirtkige qarsı soğıs", - deydi ol. "Talibandıqtar älemdegi naşanıñ eñ iri eksporterları. Barlıq älem bwl mäselege köz jwma qarap otır", - dep qınjılğan Auğanstan Prezidenti öziniñ soñğı maqsatı Talibandıqtarmen kelisimge kelu ekenin aytadı. Aşraf Ğani: "Jemqorlıqqa qarsı twru üşin onımen öziñ aynalıspauıñ qajet jäne onı jeñuge mıqtap bel baylau kerek. Auğanıstandağı eñ däuletti adamdardıñ biri jäne meniñ bilikti generalım  - abaqtıda", -  deydi.

“The Qazaq Times”