Foto: dotamaps.ru

Iraktağı Kürdistan avtonomiyasınıñ basşısı Masud Barzani osı aydıñ 25 qırküyegine josparlağan jeke täuelsiz memleket bolu statusın anıqtaytın referendum ötkizu turalı oyınan bas tartpaytının mälimdedi. Al Iraktıñ Prezidenti Fuad Masum (wltı - kürd) Masud Barzanidiñ bwl äreketin "sauatsız şeşim" dep atasa, eldiñ Prem'er-ministri Hayder  äl-Abadi referendumğa tosqauıl bolu üşin tiisti şaralar qoldanatının habarladı.   Bwl turalı APF aqparattıq agenttigi jazdı. 

Kürdistan avtonomiyasınıñ basşısı jergilikti twrğındardı referendumnan qalmay, dauıs beruge şaqırdı jäne Bağdadpen kelissözder jürgizuge tırısqan äreketi nätijesiz ayaqtalğanın jetkizdi. Irak pen Kürdistan avtonomiyası arasında mwnayğa bay Kirkuk qalasına qatıstı territoriya dauı bar ekeni belgili. Masud Barzani aldağı 1-2 jıl köleminde Irakpen mwnaylı audandarğa qatıstı şekara bölisu mäselesin talqılaytının ayttı.

Prem'er-ministrdiñ Iraktıñ twtastığın saqtap qalu üşin qolınan kelgen isten ayanbaytının habarlağan mälimdemesinen keyin, Masud Barzani kürdterdi arandatuşılıqqa ermey, terrorlıq aktiden, aşıq qaqtığıstan aulaq boluğa şaqırdı.

Iran Prezidenti Hasan Rouhani men Türkiya basşısı Rejep tayıp Erdoğan telefon arqılı äñgime barısında Iraktağı Kürdistannıñ täuelsizdik aluı ülken "haosqa" alıp keledi dep tüyip, Irak Ükimetin qoldaytının bildirdi. Tehran Iraktağı Kürdistan üşin Iraktıñ swranısımen äue joldarın jauıp tastaytının mälimdedi.

Bügin bolatın referendumğa 5 mln azamat qatısadı dep kütilip otır. Jergilikti halıq täuelsizdikti qalaytındarın, biraq referendumnan keyingi jağdaydıñ uşığuınan qorqatındıqtarın aytadı. Mäselen, 30 jastağı mwğalim Kamiran Anvar: "Men erteñ dauıs bermeymin! Öytkeni onan keyin, bizdiñ öñirge embargo salınıp, as-susız, azamattıq soğıstıñ astında qalamız ba dep qorqamın. Bir küni tañerteñ közimdi aşıp, türik äskeriniñ qaru asınıp jürgenin körgim kelmeydi" dep aşıp ayttı.

“The Qazaq Times”