Foto: Tengrinews.kz

Qazaqstanda altın qwymalardı satu bağdarlaması bastalğalı beri twrğındar salmağı 10-nan 100 gramğa deyingi 900 qwyma satıp alğan. Bwl turalı 24.kz habarladı.

Wlttıq bank törağası Daniyar Aqışev Almatıda ötken baspasöz mäslihatında bağalı metaldı qayta satudıñ eş qiındığı joq ekenin aytqan. Onıñ sözinşe, bankter olardı birden satıp aladı. Täjiribe körsetkendey, altın qwymalar – jinağan aqşanı inflyaciyadan qorğaudıñ senimdi qwralı.

Bwdan bwrın Wlttıq bank ekinşi deñgeyli bankter arqılı qazaqstandıqtarğa 17 kilogramm nemese 699 altın qwymasın satqan bolatın.

Bas bankirdiñ sözine sensek, Qazaqstandağı inflyaciya deñgeyi Wlttıq bank belgilegen 6-8% köleminen aspağan. Tauarlardıñ bağası jıl basınan beri 3,9%-ğa qımbattağan. Al ötken jılı bwl körsetkiş 5,4% bolıptı. Qarjı retteuşisiniñ boljamı boyınşa, inflyaciya deñgeyi kelesi jılı 5-7% aralığında saqtaladı.

Sonday-aq, jurnalisterdiñ swraqtarına jauap bergen Daniyar Aqışev kriptovalyutanı retteu mäselesine qatıstı da öz pikirin bildirdi.

"Qazir biz baqılauşı poziciyasın wstanıp otırmız. Eger sizder bwl kriptovalyutanı qazaqstandıq narıqta emes, aytalıq, körşi bir elden satıp alatın bolsañız, onda bwl mäseleni retteu qiın boladı", - dedi Daniyar Aqışev.

Ayta keteyik, Qazaqstanda mausım ayınan bastap tazartılğan altındı satıp alu bağdarlaması iske qosıldı. Ekinşi deñgeyli bankterden 10, 20, 50 jäne 100 gramdıq altın qwymaların satıp aluğa boladı.

“The Qazaq Times”