QR Prezidenti Nwrswltan Nazarbaev. Foto: Forbes.kz

"Cifrlı Qazaqstan" bağdarlamasınıñ ekonomikalıq äseri bayqalmaydı, al bwl oğan qarajattıñ bosqa jwmsalıp jatqanın körsetedi. QR Prezidenti Nwrswltan Nazarbaev cifrlandıru boyınşa ötken respublikalıq keñeste osılay mälimdedi. 

Prezident cifrlandıru bwl maqsat emes, ekonomikalıq ösimge qol jetkizudiñ qwralı ekenin atap ötti.

"Men Reseydiñ cifrlandıru bağdarlaması 2024 jılğa qaray JİÖ ösimin 5-6 tlrn rubl'ge deyin jetkizetinin bilemin. Olar osı üşin 1,5 trln rubl' jwmsağalı otır. Al onı qaytaru 3-4 ese. Ärine bwl ösim emes, biraq birge-bir qosıladı. Al bizdiñ bağdarlama jasauşılar qanşa qaytaradı? Biz eşteme estimedik. 2021 jılğa qaray 251 mlrd teñge jwmsaymız. Qaytarım qanday? Cifr joq. Eger osılay jwmıs istey bersek aqşa jelge ketedi nemese wrlanadı. Sondıqtan maqsatımızdı anıqtap alayıq. Eger bizdiñ jasauşılar bağdarlamanıñ äseri qanday bolatının josparlay almasa, olar bizdiñ damuımızdı tejegisi keledi dep esepteu kerek. Men naqtı aytpaymın, biraq solay boluı mümkin", - dedi Prezident.

Sonday-aq, ol cifrlandıru boyınşa Resey jäne Belarus' elderimen arnayı komissiya qwru mümkindikterin qarastırudı tapsırdı.

"Men EAEO müşelerin renjitkim kelmeydi, sondıqtan cifrlandıru boyınşa birikken komissiya qwrıp onı alğa jıljıtu kerek. Türli täjiribe bar, biz olarmen bölise alamız, mamandar bar. Prezident janınan arnayı komissiya qwru kerek. Prem'er-ministr men onıñ keñsesi komissiyanıñ jwmıs organı boladı", - dedi ol.

Osılayşa Prezident atalğan bağdarlamanı osı jıldıñ soñına deyin jasap şığuğa tapsırma berip, 2018 jıldıñ basınan bastap bwl jwmıstı özi jeke baqılap otıratının mälimdedi.

“The Qazaq Times”