Foto: catoday.org

2018 jılı ekonomikanıñ naqtı sektorların damıtu üşin byudjetten 1,4 trln teñge bölu qarastırlğan. Bwl turalı QR Qarjı ministri Baqıt Swltanov mälimdedi.

Sonday-aq, vedomstvo basşısı 2018 jılğa josparlanğan byudjet şığındarı turalı ayttı. Sonımen "Nwrlı jol" bağdarlamasın jüzege asıruğa 243,3 mlrd teñge jwmsaladı. Al "Nwrlı jer" twrğın üy bağdarlamasına 125,2 mlrd teñge jwmsau közdelgen. Agroöndiris keşenin damıtuğa, onıñ işinde subsidiya, su şaruşılığın damıtu, veterinariyağa  195 mlrd teñge qarastırılğan. Industriyalıq-innovaciyalıq damu memlekettik bağdarlamasınıñ ekinşi kezeñin iske asıruğa 76,1 mlrd teñge bölinedi.

"Respublikalıq byudjet deficiti JİÖ-ge qatıstı 2018 jıldan 2019-2020 jılğa qaray 1,1%-dan 1%-ğa deyin tömendedi, bwl memlekettik qarız kölemin qalıptı deñgeyde wstauğa mümkindik beredi", - dedi Swltanov.

Sonday-aq, mwnaydan tüsken tüsimderdiñ kölemi osı jılğı jospardıñ 851,1 mlrd teñgege ösuine baylanıstı 5,2 trln teñgeni qwraydı.

Ministrdiñ aytuınşa, 2018 jılı respublikalıq byudjettiñ şığını 9,2 trln teñge boladı jäne bwl biılğı şığınğa qarağanda 134,6 mlrd teñgege joğarı. Bwdan bölek, şığındardıñ eñ köp böligin nemese 44,5%-ın äleumettik sala qwraydı, yağni şığın biılğı jılğa qarağanda 400 milliard teñgege artıq boladı.

Ayta keteyik, memlekettik byudjetten  ekonomikanıñ naqtı sektorlarına jılda qarajat bölinedi. Alayda onıñ tolıq igeriluin köpşiligi qamtamasız etip otırğan joq. Tipti äleumettik salağa bölingen qarjı köp bolğan künniñ özinde halıq jağdayınıñ köterilgenin bayqap otırğan joqpız.

“The Qazaq Times”