Foto: YouTube

Soñğı aylarda Özbekstannıñ bwrınğı prezidenti Islam Kärimovtıñ qızı Gülnara Kärimovanıñ milliardtağan dollarları mañındağı şu basılar emes. Özbekstan eks-hanşayımınıñ älemniñ 12 elindegi qarjısına kimder talasıp jür? Kärimovanıñ qarjı qorjınına AQŞ-tıñ qanday qatısı bar? Bügin biz osı jäne özgede swraqtarğa jauap izdep köruge tırsıtıq.

Gülanara Kärimovanıñ basınan bağı tayıp, äkesi Islam Kärimov dünieden ozğalı onıñ batıs elderindegi bank şottarındağı bwğattalğan milliard dollarına talas jürip jatqanı belgili. Bastapqıda bwl talas resmi Taşkent pen AQŞ biligi arasında jürgen bolsa, endi oğan öz kezinde Kärimovten qısım körgen şetelderde qaşıp jürgen bir top sayasatkerler men qwqıq qorğauşılarda aralasa bastadı. Olar Islam Kärimov pen Gülnaradan körgen jäbirleriniñ esebi retinde Özbekstannıñ eks-hanşayımınıñ qarjısına ortaqtasqısı keletinderin auıq-auıq aytıp, halıqaralıq wyımdarğa hat joldau arqılı bildirip jür.

Özbekstandıq sayasatkerler men qwqıq qorğauşılar Guguşanıñ millardın 2003 jılı «Qazaqgeyt» dauında AQŞ, Qazaqstan biligi jäne azamattıq belsendiler kelisip qwrğan «Bota qorı» sındı qor qwru arqılı qaytarıp alğısı keledi. Ol kezde qazaq belsendileri «Qazaqgeyt» dauımen AQŞ bankterinde bwğattalıp qalğan 78 mln dollardı «Bota qorı» arqılı AQŞ-tıñ qadağalauımen Qazaqstan halqınıñ igiligine paydalanu üşin elge qaytarıp alğan bolatın. Biraq Özbekstan belsendileriniñ jasap jatqan bwl qadamdarınan däl sonday nätije şığadı dep aytu öte qiın. Sebebi özbek belsendileri bwl bastamaların Qazaqstandağıday jwrtşılıq talqısına salıp, eldiñ ziyalı qauımı men azamattıq belsendileriniñ auızımen söyletken joq. Onıñ üstine AQŞ bwl qarjını Özbekstanğa qaytaru üşin resmi Taşkentke öziniñ talaptarın qoyuı mümkin. Ol talap AQŞ-tıñ Ortalıq Aziyadağı geosayasi müddelerine baylanıstı degen de aqparat bar. AQŞ-tıñ Qırğızstandağı Manas äskeri bazasın Bişkekke qaytarıp bergennen keyin, Auğanstanğa äsker men qaru-jaraq tasmaldauı qiındağanı belgili. Sol sebepti Aqüy Taşkentke Gülnaranıñ milliardın qaytaru üşin Özbekstan aumağınan äuejay nemese äskeri baza swrauı mümkin.

Al AQŞ-tıñ bwl talabına Şavkat Mirzieevtıñ kelisui ekitalay. Öytkeni ol bilik basına kele salısımen Mäskeuge barıp, Vladimir Putinmen kezdesip, öziniñ Islam Kärimovtey jabıq esik sayasatın wstanbaytının bayqatqan. Eger Gülnara Kärimovanıñ milliardı mañındağı jağday osılay qaray örbitin bolsa, onda ol qarjı Özbekstan eline jaqın uaqıtta qaytpaydı degen söz.

“The Qazaq Times”