Foto: APF

Venesuela Prezidenti Nikolas Maduro eldegi äskeri bazağa şabuıl jasağan 10 adamğa izdeu salınğanın habarladı. Onıñ aqparatınşa, Venesuelanıñ soltüstik-batısında ornalasqan Valensiya qalasındağı äskeri bazağa jasalğan şabuılğa 20-ğa juıq adam qatısqan. Olardıñ ekeui oqiğa ornında köz jwmıp, bireui jaralanğan, qalğan jeteui abaqtığa jabıldı. Endi qoldarına qaru wstap, belgisiz bağıtta izin suıtqan tağı 10 adamğa izdeu jariyalandı.

Bwdan bwrın äleumettik jelilerde birneşe er azamattardıñ : «Biz tiraniyağa qarsı bas köteremiz» degen beynejazbaları jariyalanğan bolatın. Nikolas Maduro wlttıq arnadan halıqqa joldağan ündeuinde el äskerine jedel äreket etkenderi üşin alğıs bildirip, bolğan oqiğanı «terrorlıq akt» dep atadı. Sonday-aq memleket basşısı izdeudegi qılmıskerlerdi mindetti türde tauıp, tiisti jazasın tartqızuğa uäde berdi.

Resmi derek közderine süyensek, şabuılşılardıñ biri bwrınğı leytenant, al qalğandarı äskeri forma kigen beybit twrğındar bolğan. BBC aqparattıq agenttigi jurnalisteri soñğı tört ay boyı elde jalğasıp kele jatqan halıqtıq köterilister kezinde, el äskeri Prezident Nikolas Maduroğa adaldıqtarın birneşe ret däleldegenderin aytadı.

Sonımen qatar: «Degenmen, äskeriler de qarapayım adamdar. Olardıñ da janwyası bar jäne eldegi bolğan özgerister men dağdarıstar äskerilerdiñ otbasılarına äser etetini sözsiz. Sondıqtan, soñğı kezderi äskerilerdiñ arasında kereğar köñil küy qalıptasıp kele jatır», - dep mälimdegen BBC aqparattıq agenttigi Valensiyada bolğan oqiğağa qatısqandardıñ qatarında bir ğana äskeri boldı degenge kümän keltiredi.

Olardıñ pikirinşe, 20 şabuılşınıñ basım köpşiligi äskeriler bolğanına qaramastan, Nikolas Maduro Ükimeti bwl jayttı jasırıp otıruı mümkin.

“The Qazaq Times”