Foto: aljazeera.com

Auğanıstan halqı qwqıq qorğau organdarınan qauipsizdiktiñ küşeytilip, qorğanıstıñ nığayuın talap etip, qala köşelerine şeruge şıqtı. Soñğı kezderi Auğanıstannıñ ärtürli böliginde jii orın alğan terroristik aktiler men onıñ qwrbanına aynalğan qarapayım azamattar sanınıñ artuı jergilikti halıqtıñ aşu-ızasın tudırıp otır. Bwl turalı Äl-Jazira (Al-Jazeera) aqparattıq agenttigi jazadı. 

Soñğı bolğan jarılıs kezinde, Gerattağı meşitke jinalğan 30 adam qaza tauıp, tağı 80 azamat auır halde auruhanağa jetkizilgen. Gerat gubernatorınıñ ökili Djilani Farhad auruhanadağı adamdardıñ da ölip ketu qaupi joğarı ekendgin aytıp, alañdauşılıq bildirdi.

Onan aldın Kabuldağı Irak elşiliginiñ aldında bolğan terrakt eki küzetşiniñ ömirin qidı. Qandağardağı NATO äskerine qarsı şabuıl kezinde tağı eki amerikalıq äskeri mert bolğan.

Gerattağı meşitte jan tapsırğandar negizinen şiit mwsılmandarı bolğanımen, qwrbandardı jerleu räsiminen keyin qala köşelerine şıqqandardıñ qatarında sunnitter de bar. Qayğılı jağday bükil Gerattı biriktirdi.

Jarılısqa kuä bolğan Mwhammed Djavaş Amid: "Terrorister oq jaudıra bastağanda, meşit aldındağı küzetşiler olarğa qarsı qaru qoldanğan joq. Bwl bizdiñ qwzıretimizge kirmeydi dep, qaşa jöneldi. Sol sebepti de, 4 djihadşınıñ ekeui izin suıtıp ketti. Bizdiñ policiyağa, küzetke degen senimimiz şayqaldı", - deydi.

Halıq belsendileri qala gubernatorınıñ bolğan oqiğa üşin jauapkerşilikti moyındarına alğanın qalaydı. Şeru wyımdastıruşılarınıñ pikirinşe, memleket Gerattağı jarılıs kezindegi ölgen qwrbandar sanın 30 ğana dep,  jasırıp otır. Şın mäninde, bwl körsetkiş 70-ke juıq beybit twrğındı qwrauı mümkin.

Derekterge säykes, bir ğana 2017 jılı Auğanıstandağı terrorlıq şabuıldar nätijesinde 1 mıñ 700 twrğın mert bolğan.

“The Qazaq Times”