اۋعانىستان حالقى پوليتسيادان قاۋىپسىزدىكتى كۇشەيتۋدى سۇرادى

اۋعانىستان حالقى قۇقىق قورعاۋ ورگاندارىنان قاۋىپسىزدىكتىڭ كۇشەيتىلىپ، قورعانىستىڭ نىعايۋىن تالاپ ەتىپ، قالا كوشەلەرىنە شەرۋگە شىقتى. سوڭعى كەزدەرى اۋعانىستاننىڭ ءارتۇرلى بولىگىندە ءجيى ورىن العان تەرروريستىك اكتىلەر مەن ونىڭ قۇربانىنا اينالعان قاراپايىم ازاماتتار سانىنىڭ ارتۋى جەرگىلىكتى حالىقتىڭ اشۋ-ىزاسىن تۋدىرىپ وتىر. بۇل تۋرالى ءال-جازيرا (Al-Jazeera) اقپاراتتىق اگەنتتىگى جازادى. 

سوڭعى بولعان جارىلىس كەزىندە، گەراتتاعى مەشىتكە جينالعان 30 ادام قازا تاۋىپ، تاعى 80 ازامات اۋىر حالدە اۋرۋحاناعا جەتكىزىلگەن. گەرات گۋبەرناتورىنىڭ وكىلى دجيلاني فارحاد اۋرۋحاناداعى ادامداردىڭ دا ءولىپ كەتۋ قاۋپى جوعارى ەكەندگىن ايتىپ، الاڭداۋشىلىق ءبىلدىردى.

ونان الدىن كابۋلداعى يراك ەلشىلىگىنىڭ الدىندا بولعان تەرراكت ەكى كۇزەتشىنىڭ ءومىرىن قيدى. قانداعارداعى ناتو اسكەرىنە قارسى شابۋىل كەزىندە تاعى ەكى امەريكالىق اسكەري مەرت بولعان.

گەراتتاعى مەشىتتە جان تاپسىرعاندار نەگىزىنەن شيت مۇسىلماندارى بولعانىمەن، قۇربانداردى جەرلەۋ راسىمىنەن كەيىن قالا كوشەلەرىنە شىققانداردىڭ قاتارىندا سۋننيتتەر دە بار. قايعىلى جاعداي بۇكىل گەراتتى بىرىكتىردى.

جارىلىسقا كۋا بولعان مۇحاممەد دجاۆاش اميد: "تەرروريستەر وق جاۋدىرا باستاعاندا، مەشىت الدىنداعى كۇزەتشىلەر ولارعا قارسى قارۋ قولدانعان جوق. بۇل ءبىزدىڭ قۇزىرەتىمىزگە كىرمەيدى دەپ، قاشا جونەلدى. سول سەبەپتى دە، 4 دجيحادشىنىڭ ەكەۋى ءىزىن سۋىتىپ كەتتى. ءبىزدىڭ پوليتسياعا، كۇزەتكە دەگەن سەنىمىمىز شايقالدى", - دەيدى.

حالىق بەلسەندىلەرى قالا گۋبەرناتورىنىڭ بولعان وقيعا ءۇشىن جاۋاپكەرشىلىكتى مويىندارىنا العانىن قالايدى. شەرۋ ۇيىمداستىرۋشىلارىنىڭ پىكىرىنشە، مەملەكەت گەراتتاعى جارىلىس كەزىندەگى ولگەن قۇرباندار سانىن 30 عانا دەپ،  جاسىرىپ وتىر. شىن مانىندە، بۇل كورسەتكىش 70-كە جۋىق بەيبىت تۇرعىندى قۇراۋى مۇمكىن.

دەرەكتەرگە سايكەس، ءبىر عانا 2017 جىلى اۋعانىستانداعى تەررورلىق شابۋىلدار ناتيجەسىندە 1 مىڭ 700 تۇرعىن مەرت بولعان.

“The Qazaq Times”