Foto: aljazeera.com

Şeyh Tamim ben Hamad Al' Tani Katardıñ diplomatiyalıq dağdarıstı şeşu üşin Arab elderimen kelissözderge dayın ekendigin ayta kele: "Degenmen kez kelgen dialog Katardıñ täuelsizdigine qwrmetpen qarauı tiis", - dep mälimdedi. Bwl turalı Äl-Jazira (Al-Jazeera) aqparattıq agenttigi habarladı. 

Katardıñ basşısı sonday-aq, memleket basına tuğan  qiın kezeñde ekonomikalıq, diplomatiyalıq twrğıda qoldau körsetken AQŞ, Türkiya men Germaniyağa jäne Arab elderimen aradağı mediaciyalıq qızmeti üşin Kuveytke  alğıs bildirdi.

Esteriñizge sala keteyik, Saud Arabiyası, Birikken Arab Ämirlikteri, Egipet men Bahreyn  Katardı terroristik wyımdardı qarjılandırdı dep ayıptap, onımen diplomatiyalıq qarım-qatınastarın üzgen edi. Diplomatiyalıq blokadadan qwtılu üşin Katarğa 13 türli mindettemeni orındau jükteldi. Olardıñ qatarında eldegi Türkiyanıñ äskerilerin memleketten şığaru, Iranmen şekaranı jabu, Al-Jazeera telearnasınıñ qızmetin toqtatu, t.b. talaptar bolğan. Katar bwl talaptar memlekettiñ sırtqı sayasattağı bağdarların jeke anıqtauına salınıp otırğan şekteu dep qabıldap, ul'timatumdı  orındaudan bas tartqan bolatın.

Şeyh Tamim ben Hamad Al' Tani öz sözinde Katar halqına tözimdilik pen beriktik tanıtqandarı üşin rizaşılıq  bildirdi: "Bizdiñ halqımız bükil älemge ruhınıñ qanday mıqtı ekendigin körsetti. Orın alğan dağdarıs pen qiındıqtarğa qaramastan, olar özderin öte sabırlı wstadı. Men sizderdi arı qaray da bekem boluğa şaqıramın. Biz - 2022 jılı futboldan älem çempionatın ötkizetin elmiz. Bwl biz üşin aldın-ala dayındalğan sınaq bolatın jäne biz onı oydağıday tapsırdıq".

Osıdan bwrın Katardıñ memlekettik saytı men wlttıq arnasına hakerlik şabuıl jasalıp, el biliginiñ  terroristik wyımdardı qarjılandırğanı jöninde aqparattar jariyalanğan bolatın. Älemdik qauımdastıqtıñ pikirin özgertu maqsatında jasalğan bwl äreketke qarsı AQŞ-tıñ memlekettik hatşısı Reks Tillerson: "Katardıñ bükilälemdik terrorizm men ekstremizmge qarsı jürgizip otırğan küresin joğarı bağalaymız" dep, körşiles memleketterdi diplomatiyalıq blokadanı doğaruğa şaqırdı.

“The Qazaq Times”