AQŞ Senatı Reseyge qısımdı arttırudı qoldadı. Foto: San Francisco Chronicle.

 

AQŞ jergilikti uaqıtımen 14 mausım küni AQŞ Senatında absolyutti köpşilik dauıstıñ nätijesinde, Reseyge sankciya qısımın arttıru zañ jobasın maqwldadı. Bwl Aqüy üşin Reseyge qatıstı birqatar mäselelerdi şeşudiñ şarası bolıp tabılıp otır. Onıñ işinde atı şulı 2016 jıldıñ soñındağı AQŞ prezident saylau isine Reseydiñ aralasuı da bar.

“The Wall Street Journal” basılımınıñ habarına qarağanda, Senatta maqwldaudan ötken joğarıdağı zañ jobası, Reseyge birqatar jaña şekteuler qoyadı. Sonıñ işinde adam qwqığın şektegeni üşin jazalau da bar dep körsetken. Oğan qosa, Süriya ükimetine qaru satu jäne reseylik «patriot hakerlerdiñ» Resey atınan jelilik şabuıldar wyımdastıruı qatarlı isterine belgilengen jazalar da bar. Eñ mañızdısı atalğan zañ jobasında AQŞ prezidenti Tramp Reseyge qarsı sankciyanı keñeytu üşin Kongrestiñ aldın ala maqwldauınan ötui kerek delingen. Bwl Tramptıñ Resey-AQŞ qatınasın jaqsartu üşin jasaytın qadamdarın şekteytini anıq.

Reuters agenttiginiñ habarına qarağanda, Reseyge qarsı sankciyanı arttıru zañ jobası men Iranğa qarsı qısımdı arttıru jobası qatar berilgen. Senat müşeleriniñ Reseyge sankciya saluğa jäne Tramptıñ sankciyanı şekteu şarasın tizgindeuge qwlıqtı ekeni sonşa, 97 adam maqwldap, 2 adam ğana qarsı dauıs bergen.

Reseydiñ Sputniktik aqparattıq agenttiginiñ keşegi habarında, Resey Federaciya Keñesi Halıqaralıq ister jönindegi komitetiniñ törağasınıñ birinşi orınbasarı bwl is turalı «Resey eşqanday da bir jauap qaytarmaydı» dep ğana sözdi şort kesken.

“The Qazaq Times”