اقش سانكتسيا قىسىمىن ارتتىرا تۇسپەك، ال رەسەيگە ءبارىبىر

اقش جەرگىلىكتى ۋاقىتىمەن 14 ماۋسىم كۇنى اقش سەناتىندا ءابسوليۋتتى كوپشىلىك داۋىستىڭ ناتيجەسىندە، رەسەيگە سانكتسيا قىسىمىن ارتتىرۋ زاڭ جوباسىن ماقۇلدادى. بۇل اقۇي ءۇشىن رەسەيگە قاتىستى بىرقاتار ماسەلەلەردى شەشۋدىڭ شاراسى بولىپ تابىلىپ وتىر. ونىڭ ىشىندە اتى شۋلى 2016 جىلدىڭ سوڭىنداعى اقش پرەزيدەنت سايلاۋ ىسىنە رەسەيدىڭ ارالاسۋى دا بار.

“The Wall Street Journal” باسىلىمىنىڭ حابارىنا قاراعاندا، سەناتتا ماقۇلداۋدان وتكەن جوعارىداعى زاڭ جوباسى، رەسەيگە بىرقاتار جاڭا شەكتەۋلەر قويادى. سونىڭ ىشىندە ادام قۇقىعىن شەكتەگەنى ءۇشىن جازالاۋ دا بار دەپ كورسەتكەن. وعان قوسا، ءسۇريا ۇكىمەتىنە قارۋ ساتۋ جانە رەسەيلىك «پاتريوت حاكەرلەردىڭ» رەسەي اتىنان جەلىلىك شابۋىلدار ۇيىمداستىرۋى قاتارلى ىستەرىنە بەلگىلەنگەن جازالار دا بار. ەڭ ماڭىزدىسى اتالعان زاڭ جوباسىندا اقش پرەزيدەنتى ترامپ رەسەيگە قارسى سانكتسيانى كەڭەيتۋ ءۇشىن كونگرەستىڭ الدىن الا ماقۇلداۋىنان ءوتۋى كەرەك دەلىنگەن. بۇل ترامپتىڭ رەسەي-اقش قاتىناسىن جاقسارتۋ ءۇشىن جاسايتىن قادامدارىن شەكتەيتىنى انىق.

Reuters اگەنتتىگىنىڭ حابارىنا قاراعاندا، رەسەيگە قارسى سانكتسيانى ارتتىرۋ زاڭ جوباسى مەن يرانعا قارسى قىسىمدى ارتتىرۋ جوباسى قاتار بەرىلگەن. سەنات مۇشەلەرىنىڭ رەسەيگە سانكتسيا سالۋعا جانە ترامپتىڭ سانكتسيانى شەكتەۋ شاراسىن تىزگىندەۋگە قۇلىقتى ەكەنى سونشا، 97 ادام ماقۇلداپ، 2 ادام عانا قارسى داۋىس بەرگەن.

رەسەيدىڭ سپۋتنيكتىك اقپاراتتىق اگەنتتىگىنىڭ كەشەگى حابارىندا، رەسەي فەدەراتسيا كەڭەسى حالىقارالىق ىستەر جونىندەگى كوميتەتىنىڭ توراعاسىنىڭ ءبىرىنشى ورىنباسارى بۇل ءىس تۋرالى «رەسەي ەشقانداي دا ءبىر جاۋاپ قايتارمايدى» دەپ عانا ءسوزدى شورت كەسكەن.

“The Qazaq Times”