2017 jılğı 09-10 mausım künderi Wlttıq wlan Bas qolbasşısınıñ Bas jüldesi üşin «Oñtüstik» öñirlik qolbasşılığında dästürge aynalğan öñirlik qolbasşılıq äskeri bölimderi arasında äskeri orkestrlerdiñ Vİ Halıqaralıq «Äskeri kerney» festivaline irikteu kezeñi bolıp, jeñimpazdar anıqtaldı.

Bayqau-konkurstıñ alğaşqı küni Wlttıq wlan «Oñtüstik» öñirlik qolbasşılığı äskeri bölimderiniñ äskeri orkestrleri türli janrdağı otandıq sazgerlerdiñ halıqtıq, estradalıq jäne klassikalıq tuındılarımen birge şeteldik ataqtı kompozitorlardıñ da belgili şığarmaların orındaudan, qozğalısta jauıngerlik parad-defile körsetuden jäne plac-koncert beruden baq sınastı.

Bayqau-sayıstıñ ekinşi küni öñirlik qolbasşılıq äskeri orkestrleri jäne Wlttıq wlannıñ «General» muzıkalıq aspaptar tobı Almatı qalasındağı 28-gvardiyaşı-panfilovşılar parkiniñ «Mäñgilik Dañq» memorialınıñ aldında plac-koncert wyımdastırıp, qala twrğındarına erekşe köñil-küy sıyladı.

Otansüygiştik pen wrpaqtar sabaqtastığı ruhında örilgen plac-koncert Wlttıq wlannıñ 25 jıldığı jäne Astana qalasında ötip jatqan Bükilälemdik EKSPO körmesi ayasında ötkizildi jäne ondağı öner tuındılarımen qatar, äskeri-qızmetşilerdiñ qoyan-qoltıq wrıstan tanımdıq körsetilimderi jiılğan qauım üşin birden-bir este qalarlıqtay dästürli jarqın körsetilim boldı.

Atalğan plac-koncertti qala twrğındarımen qatar Avstraliya memleketinen kelgen arnayı qonaqtar da tamaşalap, äskerilerdiñ önerine tänti bolıp, birqatarı orkestrlermen qosılıp, birge bilep te jattı.

Eki künge sozılğan dästürli «Äskeri kerney» bayqau-sayısınıñ qorıtındısı boyınşa irikteu kezeñinde üzdik dep tanılğan 5571 äskeri böliminiñ äskeri orkestri birinşi orınğa ie bolıp, «Oñtüstik» öñirlik qolbasşılığı qolbasşısınıñ birinşi därejeli diplomımen marapattaldı. Al özderiniñ keremet tuındılarımen äskeri qızmetşiler men qala twrğındarın tänti etken Şımkent qalasındağı 6506 äskeri böliminiñ orkestri ekinşi orındı qanjığalarına baylasa, Taraz qalasındağı 5513 äskeri böliminiñ orkestri de üzdikter qatarınan tabılıp, jüldeli üşinşi orınğa ie boldı. Sonımen qatar sayısta 5571 äskeri bölimi orkestriniñ orındauşı-solisi kişi serjant Ivan Martınenko «Üzdik orındauşı-solist» nominaciyasında üzdik dep tanılsa, «Üzdik aspapşı» nominaciyasında 5513 äskeri bölimi orkestriniñ aspapşısı starşina Lyudmila Şalunova top jardı.

Leytenant YAlkun Azizov, 5571 äskeri bölimi äskeri orkestriniñ dirijeri: «Biz bwl sayısqa ülken dayındıqpen keldik. Bwl bayqauda bastısı sinhrondı türde saptıq öner körsetu. Muzıkalıq aspaptarda saptıq täsilder men bileu arqılı muzıkalıq aspaptarda öner körsetu ülken eñbekti talap etedi. Biz aldımızğa qoyılğan maqsatqa jettik dep oylaymız. Bwl jerde orkestr qwramınıñ üzdiksiz tınbay eñbektengen qajırlı eñbegin atap ötkim kelip otır. Bügingi sayısta biz türli kompoziciyadağı öner tuındılarımen qatar qazaqtıñ «Sarjaylau» attı aytulı änin jüregimizben orındap şıqtıq dep oylaymın» - dedi.

Aldağı uaqıtta jeñimpaz dep tanılğan 5571 äskeri bölimi orkestriniñ dirijeri YAlkun Azizov jetekşilik etetin orkestr wjımı Astana qalasında Wlttıq wlan Bas qolbasşısınıñ Bas jüldesi üşin  ötetin   Halıqaralıq «Äskeri kerney» festivalinde «Oñtüstik» öñirlik qolbasşılığınıñ namısın qorğaytın boladı.  

“The Qazaq Times”