2017 جىلعى 09-10 ماۋسىم كۇندەرى ۇلتتىق ۇلان باس قولباسشىسىنىڭ باس جۇلدەسى ءۇشىن «وڭتۇستىك» وڭىرلىك قولباسشىلىعىندا داستۇرگە اينالعان وڭىرلىك قولباسشىلىق اسكەري بولىمدەرى اراسىندا اسكەري وركەسترلەردىڭ Vءى حالىقارالىق «اسكەري كەرنەي» فەستيۆالىنە ىرىكتەۋ كەزەڭى بولىپ، جەڭىمپازدار انىقتالدى.

بايقاۋ-كونكۋرستىڭ العاشقى كۇنى ۇلتتىق ۇلان «وڭتۇستىك» وڭىرلىك قولباسشىلىعى اسكەري بولىمدەرىنىڭ اسكەري وركەسترلەرى ءتۇرلى جانرداعى وتاندىق سازگەرلەردىڭ حالىقتىق، ەسترادالىق جانە كلاسسيكالىق تۋىندىلارىمەن بىرگە شەتەلدىك اتاقتى كومپوزيتورلاردىڭ دا بەلگىلى شىعارمالارىن ورىنداۋدان، قوزعالىستا جاۋىنگەرلىك پاراد-دەفيلە كورسەتۋدەن جانە پلاتس-كونتسەرت بەرۋدەن باق سىناستى.

بايقاۋ-سايىستىڭ ەكىنشى كۇنى وڭىرلىك قولباسشىلىق اسكەري وركەسترلەرى جانە ۇلتتىق ۇلاننىڭ «گەنەرال» مۋزىكالىق اسپاپتار توبى الماتى قالاسىنداعى 28-گۆاردياشى-پانفيلوۆشىلار پاركىنىڭ «ماڭگىلىك داڭق» مەموريالىنىڭ الدىندا پلاتس-كونتسەرت ۇيىمداستىرىپ، قالا تۇرعىندارىنا ەرەكشە كوڭىل-كۇي سىيلادى.

وتانسۇيگىشتىك پەن ۇرپاقتار ساباقتاستىعى رۋحىندا ورىلگەن پلاتس-كونتسەرت ۇلتتىق ۇلاننىڭ 25 جىلدىعى جانە استانا قالاسىندا ءوتىپ جاتقان بۇكىلالەمدىك ەكسپو كورمەسى اياسىندا وتكىزىلدى جانە ونداعى ونەر تۋىندىلارىمەن قاتار، اسكەري-قىزمەتشىلەردىڭ قويان-قولتىق ۇرىستان تانىمدىق كورسەتىلىمدەرى جيىلعان قاۋىم ءۇشىن بىردەن-ءبىر ەستە قالارلىقتاي ءداستۇرلى جارقىن كورسەتىلىم بولدى.

اتالعان پلاتس-كونتسەرتتى قالا تۇرعىندارىمەن قاتار اۆستراليا مەملەكەتىنەن كەلگەن ارنايى قوناقتار دا تاماشالاپ، اسكەريلەردىڭ ونەرىنە ءتانتى بولىپ، بىرقاتارى وركەسترلەرمەن قوسىلىپ، بىرگە بيلەپ تە جاتتى.

ەكى كۇنگە سوزىلعان ءداستۇرلى «اسكەري كەرنەي» بايقاۋ-سايىسىنىڭ قورىتىندىسى بويىنشا ىرىكتەۋ كەزەڭىندە ۇزدىك دەپ تانىلعان 5571 اسكەري ءبولىمىنىڭ اسكەري وركەسترى ءبىرىنشى ورىنعا يە بولىپ، «وڭتۇستىك» وڭىرلىك قولباسشىلىعى قولباسشىسىنىڭ ءبىرىنشى دارەجەلى ديپلومىمەن ماراپاتتالدى. ال وزدەرىنىڭ كەرەمەت تۋىندىلارىمەن اسكەري قىزمەتشىلەر مەن قالا تۇرعىندارىن ءتانتى ەتكەن شىمكەنت قالاسىنداعى 6506 اسكەري ءبولىمىنىڭ وركەسترى ەكىنشى ورىندى قانجىعالارىنا بايلاسا، تاراز قالاسىنداعى 5513 اسكەري ءبولىمىنىڭ وركەسترى دە ۇزدىكتەر قاتارىنان تابىلىپ، جۇلدەلى ءۇشىنشى ورىنعا يە بولدى. سونىمەن قاتار سايىستا 5571 اسكەري ءبولىمى وركەسترىنىڭ ورىنداۋشى-ءسوليسى كىشى سەرجانت يۆان مارتىنەنكو «ۇزدىك ورىنداۋشى-سوليست» نوميناتسياسىندا ۇزدىك دەپ تانىلسا، «ۇزدىك اسپاپشى» نوميناتسياسىندا 5513 اسكەري ءبولىمى وركەسترىنىڭ اسپاپشىسى ستارشينا ليۋدميلا شالۋنوۆا توپ جاردى.

لەيتەنانت يالكۋن ازيزوۆ، 5571 اسكەري ءبولىمى اسكەري وركەسترىنىڭ ديريجەرى: «ءبىز بۇل سايىسقا ۇلكەن دايىندىقپەن كەلدىك. بۇل بايقاۋدا باستىسى سينحروندى تۇردە ساپتىق ونەر كورسەتۋ. مۋزىكالىق اسپاپتاردا ساپتىق تاسىلدەر مەن بيلەۋ ارقىلى مۋزىكالىق اسپاپتاردا ونەر كورسەتۋ ۇلكەن ەڭبەكتى تالاپ ەتەدى. ءبىز الدىمىزعا قويىلعان ماقساتقا جەتتىك دەپ ويلايمىز. بۇل جەردە وركەستر قۇرامىنىڭ ۇزدىكسىز تىنباي ەڭبەكتەنگەن قاجىرلى ەڭبەگىن اتاپ وتكىم كەلىپ وتىر. بۇگىنگى سايىستا ءبىز ءتۇرلى كومپوزيتسياداعى ونەر تۋىندىلارىمەن قاتار قازاقتىڭ «سارجايلاۋ» اتتى ايتۋلى ءانىن جۇرەگىمىزبەن ورىنداپ شىقتىق دەپ ويلايمىن» - دەدى.

الداعى ۋاقىتتا جەڭىمپاز دەپ تانىلعان 5571 اسكەري ءبولىمى وركەسترىنىڭ ديريجەرى يالكۋن ازيزوۆ جەتەكشىلىك ەتەتىن وركەستر ۇجىمى استانا قالاسىندا ۇلتتىق ۇلان باس قولباسشىسىنىڭ باس جۇلدەسى ءۇشىن  وتەتىن   حالىقارالىق «اسكەري كەرنەي» فەستيۆالىندە «وڭتۇستىك» وڭىرلىك قولباسشىلىعىنىڭ نامىسىن قورعايتىن بولادى.  

“The Qazaq Times”