Jwma, 3 Mamır 2024

Zeynetke şığuına 3 ay qalğan azamattar ğana zeynetaqısın eseptete aladı

Qazaq Times 5 Mausım, 2017 sağat 17:35

Foto: gov4c.kz

Astanada bolaşaq zeynetkerler zeynetaqı tölemderin aldın ala eseptey alatın boladı. Bir qızığı zeynetke şığuına deyin köp degende 3 ay qalğan azamattar ğana aldın ala esepteu üşin ötiniş bildiruge kele aladı eken. Bwl turalı «Azamattarğa arnalğan ükimet» memlekettik korporaciyası» KE AQ baspasöz qızmeti habarladı.

Zeynetaqını aldın ala esepteu jäne keñes alu üşin eñbek kitapşasın, bilimi turalı diplomın, äskeri biletin, neke turalı kuälikti wsınu qajet. Sonday-aq äyel adamdar üşin balalarınıñ tuu turalı kuälikteri men jeke kuälikteri kerek boladı. Jwmıs ötilin rastaytın qwjattar bolmağan jağdayda, mwrağat anıqtamasın, sot şeşimin, oñaltu turalı anıqtamanı wsınuğa boladı.Bwl üşin olar Astana qalası «Äleumettik tölemderdi vedomstvoaralıq esepteu ortalığı» departamentiniñ bek-ofisterine jüginulerine nemese qajetti qwjattardı zeinetker@goscorp.kz elektrondıq poştasına joldaularına boladı.

«Azamattarğa arnalğan ükimet» memlekettik korporaciyası» KE AQ Basqarma törağası Abılayhan Ospanovtıñ aytuınşa, osı pilottıq jobanı testten ötkizu – memlekettik qızmetterdi belsendi körsetuge alğaşqı qadam.

«Biz azamattardıñ memlekettik qızmetterdi alu üşin bizge kelulerin kütip otırmay, olardı aluğa özimiz bastamaşılıq jasağımız keletinin birneşe ret aytqanbız. Äzirşe bwl – biz bastamaşılıq jasağan birinşi pilottıq joba. Sonday-aq biz klinetterge olar zeynetaqı tölemderin üyden şıqpay-aq aldın ala eseptey alatındarın esterine salamız. Bolaşaqta osınday köptegen pilottar qızmetterdi belsendi körsetuge bağıttalatın boladı dep oylaymın», – dedi Ospanov.

Ospanov pilottıq jobanıñ äzirşe tek Astanada testiden ötetinin, al azamattar tarapınan oñ pikirler bolğan jağdayda, ol Qazaqstannıñ basqa da qalalarına taratılatının aytıp ötti.

Baspasöz qızmetiniñ mälimetinşe, zeynetaqınıñ aldın ala mölşeri körsetiletin aqparattı memlekettik korporaciyanıñ qızmetkerleri ötiniş elektrondıq poştağa tüskennen keyin 3 jwmıs küninen keşiktirmey wsınuğa mindetti. Eger azamat korporaciyanıñ bek-ofisine jügingen bolsa, onda ol mwnı sol küni-aq bile aladı.

“The Qazaq Times”