Qaladan jalğız şıqqam. Kölikpen. Betalsım jaqın jer emes. Şığıs jaqtağı mıñ şaqırım qaşıqtıqtağı Jarbastau audanı.   Jol boyındağı janarmay beketine ayaldap, endi qozğala bergenimde mölşeri 20 jasqa endi kelgen jigit kelip amandastı da:

– Ağa, Jarbastauğa barmaysız ba? – dep swradı.

– Iä, – dedim men.

– Ala ketesiz be?

– Jarydı, kölikke otıra ğoy, – dedim men japadan jalğız zerikkenşe jol boyı äñgimelesip otırar dep oylap.

– Ağa, biraq mende jolğa berer aqşam joq, Qajet deseñiz jaqsı bir sağatım bar edi sonı berem,  – dep tös qaltasınan jay adamdardıñ qolı jete bermeytin bir qımbat sağattı alıp şıqtı.

– Keregi joq, jol boyı zeriktirmey äñgimelesip otırsañ jetedi... – dedim külip.

Kölikke otırıp az jürgesin, Qorğandağı jol policiyasınıñ tekseru beketine jete bere:

– Ağa, janımda qwjatım joq edi... jaqın tuısım dep alıp ötip ketiñizşi, – dedi, jalınışpen.

– Jaraydı, – dedim mende selsoq. Degenmen äldeneden tiksinip qalğanday boldım.

Bağımızğa jaray tekseruge toqtamay-aq ötip kettik.

Az-kem jürgen soñ:

– Al, inim äñgimeñdi ayta otır, janıñda kök tiın aqşañ da, tım qwrğanda kim ekeniñdi ayğaqtaytın qwjatıñ da joq. Alda tağı da tekseru beketteri bar. Dekenmen, seni jolğa qaltırmay jetkizip qoyamın. Qanday sırıñ bar jasırmay ayt, – dedim.

– Ağa, pälekettiñ bäri osı sağattan bastaldı, – dep ol äñgimesin bastap ketti.

***

Osıdan onşaqtı kün bwrın bir şarualarımmen körşi audanğa barıp qayttım. Qayta kelgenimde vokzaldan  bwrın universitette birge oqığan tanıs jigitke jolığıp qaldım. Hal-jağdayı tamaşa sekildi, kigen kiiminiñ özi-aq aytıp twr. Kezige şüyirkelesip kettik. Studenttik kezimizdi eske alıp, biraz äñgimeniñ tiegin ağıttıq. Qazir beldi bir kompaniyanıñ iesi eken.

– Asığıs jolğa ketip baramın... Kelgesin özim izdep tauıp alamın... Mınanı estelikke tağıp jür... joğaltıp alma, bazarın tapsañ bir maşinanıñ qwnın şığaradı, – dep qoyarda-qoymay osı sağattı berdi de, özi jaña men tüsken poyızğa minip ketip qaldı.

Oylamağan jerden qımbat sağatqa ie bolğanıma quanıp men qaldım. Qalanıñ şet jağınan üş jigit birge päter jaldap twratınbız. Kele sala qımbat sağatımdı solarğa körsettim. Bölmedegi üy iesinen qalğan eski teledidardı qosıp jañalıq qarap otırğanbız. Tosın oqiğa turalı bağdarlama şıqqanda esimnen tanıp qwlap qala jazdadım.

Ekranda bağana ğana poyızğa minip ketken dosım qan josa bolıp ölip jatır.

Jürgizuşi: «Ötken tüni bilgili käsipkerdi bireuler jwmıs ornında atıp, janındağı bar düniesin bwlap ketken. Ayqın belgileriniñ biri arnayı tapsırıspen jasalğan sağatın da alıp ketipti» dep sağattıñ fotosın şığardı.

– Asqar mınu sol sağat qoy!

Janımda otırğan Bektas sağattı mağan qaray laqtırıp jiberdi.

– Joq, ras aytam. Bağana ğana men tüsken poyızğa minip ketken, – dep men şır-pır bolıp jatırmın.

– Qoy, keşe ölgen adam sağan qaydan jolığadı, – dep olar küş bermeydi.

– Ol keşe ölgen bolsa sağatın mağan qalay berdi, – deppin men de mäñgirip.

– Äñgime osında. Onıñ sağatı sende qalay jür. Bwl ayğaq. Sen öltirgen şığarsıñ.

Bektas ornınan atıp twrıp meniñ alqımımnan ala tüsti de, «seni öz qolımmen policiyağa aparıp berem» dep esikke qaray süyreley jöneldi. Arağa Erbol kelip tüsti.  Osı kezde Bektastıñ qolı bosap ketti. Men aşıq twrğan esikten sırtqa twra qaştım. Sol qaşqannan tañ atqanşa jürip, manağı may qwyu beketine kelip, Jarbastau jaqtağı apayıma barıp istiñ anıq-qanığı aşılğanşa panalay twrsam degem. «Senseñiz de, senbeseñiz de, bolğan jağday osı, al qımbat sağatı mınau» dep sağattı mağan qaray wsındı.

Men ne derimdi bilmey, sağattı qolıma alıp kördim. Bir türli qannıñ müñkigen iisi keletin sekildi.

– Ağa meni Jarbastauğa deyin ala ketiñizşi... jaray ma,  – dedi ol jılamsırap.

Men ne bolsa da onı barar jetine jetkizip salmaq  bolıp şeştim.

 

Aldımızda tağı bir tekseru beketi...

– Ağa men kölikte otıra twrayın öziñiz barıp keliñiz... Tek, meni wstap bermeytin şığarsız...

Asqar bağanağıday emes özin erkin wstap otır.

– Maqwl, – dedim de jol policiyasımen birge jol şetindegi beket üyine kirdim.

– Qayda bet aldıñız.

– Jarbastauğa.

– Jalğızsız ba?

– Joq, bir tuısqan inim bar, – dedim men özimdi barınşa jaybıraqat wstap.

– İniñiz qayda edi? – jaña ğana menimen birge kirgen qızmetker mağan tañdana qarap twr.

– Kölikte!

– Men qalay bayqamadım onda, – degen ol sırtqa qaray şığa jönedi.

Osı kezde qabırğada qosulı twrğan teledidardan “Tosın oqiğa” bağdarlamasın berip jatır eken.

Ekranda qan josa bolıp manadan meniñ qasımda kele jatqan Asqar jatır. Jürgizuşi : «Ötken tüni jol boyında, bir jigitti öltirip janındağı bar düniesin bwlap ketken. Ayqın belgileriniñ biri arnayı tapsırıspen jasalğan sağatın alıp ketipti» degende közim qarauıtıp ketti. Mana bayqamay, Asqardıñ sağatın özimmen birge ala şığıppın...

Qoyşıbek MÜBARAK

"The Qazaq Times"