7 mamır - Otan qorğauşılar küni. Foto: Reuters/Şamil' Jumatov

7 mamır - Qazaqstan Respublikasınıñ Otan qorğauşılar küni. Bwl täuelsiz elimizdiñ özindik qorğanıs qabileti bar ekenin bildiretin mereke. Endeşe egemendi elimizdiñ otın söndirmey, qorğanıs jüyemizdi bekem wstap kele jatqan barlıq Qazaqstan azamattarın töl merekelerimen qwttıqtaymız!

Bwl künniñ mereke retinde atalıp ötuine  1992 jıldıñ 7 mamırında täuelsiz eldiñ zañdıq qwqıqtarınıñ negizderine jäne täuelsiz memleketter dostığına qatısuşı memleketter arasına qol jetken kelisimderge baylanıstı QR Prezidenti N.Ä.Nazarbaevtıñ Jarlığı sebep boldı. Bwl Jarlıq boyınşa, Qazaqstan aumağına ornalasqan Qarulı Küşter  özderiniñ mülikterimen qosa, respublikanıñ qarauına ötti. Joğarğı Bas Qolbasşı retinde Qarulı Küşterdi basqarudı Prezident öz moynına alıp, alğaşqı Qorğanıs ministri bolıp general-polkovnik S.Nwrmağanbetov tağayındaldı.

Osı jılı Qazaqstan Respublikasınıñ Prezidenti Nwrswltan Nazarbaevtıñ Jarlığımen üş jüyeli ştab - jayau äskerler, äue qorğanısı küşteri men äskeri-teñiz küşteriniñ bas ştabı bekitildi. Aerowtqır küşterge Joğarğı Bas qolbasşınıñ rezervi qwzırı berildi.

2001 jıldan Qazaqstan Ortalıq, Oñtüstik, Batıs jäne Şığıs bolıp 4 äskeri okrugke bölindi. 2007 jılğı Äskeri doktrinada memlekettiñ äskeri wyımın damıtudıñ negizgi bağıttarınıñ biri öñirlik qolbasşılıqtar äskerleriniñ belgilengen jauaptılıq aymaqtarında äskeri qauipsizdik mindetterin şeşu mäselelerindegi naqtı derbestigin qamtamasız etu jäne äskerlerdiñ strategiyalıq bağıttardağı jetkilikti toptastıqtarın qwru bolıp ayqındaldı.

“The Qazaq Times”