ساداق اتۋ جارىسىنان ءبىر ءسات. فوتو: kz.ts.cn/altai

قىتايدىڭ التاي ايماعىندا دا ءبىراز تىۆا تۋىسقاندار بار. ۇلتتىق سالت-ءداستۇرىن ۇلىقتاپ تۇرادى. جاڭا جىلدا ولار سپورت مەرەكەسىنە قاتىسىپ، ساداق اتۋدان جارىس وتكىزدى. بۇل تۋرالى «التاي اقپارات» تورابى حابارلايدى.

ساداق اتۋ تىۆالار ءۇشىن ۇلكەن ونەر، ولمەس ءداستۇردىڭ ءبىرى. سودان بولار، ءالى كۇنگە ساداعىن تاستاماي، جەبەسىن جانىپ جۇرگەنى. كەزىندە قالاي بولعانىن كىم ءبىلسىن، قازىر ولار مەرگەندىكتەرىن سيىر تەرىسىنەن جاسالعان دوپتى اتۋمەن ولشەيدى. الدىمەن، مۇز ۇستىنەن كولەمى التى مەتر بولاتىن شەڭبەر سىزادى. الگى دوپتى شەڭبەردىڭ ىشىنە قويىپ، ساداقشى وتىز مەتر قاشىقتىقتان اتىپ، دوپتى شەڭبەردەن شىعارۋ كەرەك. بۇنى مەرگەنمىن دەگەن جىگىتتەر عانا ىستەي الادى ەكەن.

قازىر ەشكىم ساداق اتىپ، كۇندەلىكتى تۇرمىستا ىستەتپەگەنىمەن، تىۆالار ءار جىلعى مەرەكەدە وسىنداي جارىس  ۇيىمداستىرىپ، ەرتەدەگى جاۋىنگەرلىك، اڭشىلىق ومىرلەرىن ەسكە الىپ تۇرادى.

"The Qazaq Times"