كوروناۆيرۋس ينفەكتسياسىنىڭ بىرنەشە دەرەگى تىركەلۋىنە بايلانىستى ىندەتتىڭ تارالۋىنا جول بەرمەۋ ماقساتىندا كەربۇلاق اۋدانىنىڭ سارىوزەك كەنتى كارانتينگە جابىلادى. بۇل تۋرالى اۋداننىڭ باس مەملەكەتتىك سانيتارلىق دارىگەرى ە.ەشكەنوۆتىڭ قاۋلىسى قابىلداندى, - دەپ حابارلايدى الماتى وبلىسى اكىمىنىڭ ءباسپاسوز قىزمەتى.

وبلىس اۋماعىندا بۇگىنگە دەيىن COVID-19 ۆيرۋسىن جۇقتىرعاندار سانى 37 ادامعا جەتكەن.

اتالعان قاۋلىدا كارانتين كەزىندەگى شەكتەۋلەر، سانيتارلىق-دەزينفەكتسيالىق شارالار تۋرالى ەگجەي-تەگجەيلى اتاپ كورسەتىلگەن. قاۋلى تالاپتارىنا سايكەس سارىوزەك تۇرعىندارىنىڭ ۇيدەن شىعۋىنا تىيىم سالىنادى. ءبىر وتباسىدان تەك ءبىر ادامعا عانا كۇنىنە ءبىر رەت ازىق-تۇلىككە، دارىحاناعا، ءبىرىنشى كەزەكتەگى قاجەتتىلىكتەر الۋعا شىعۋىنا رۇقسات ەتىلەدى. كارانتين رەجيمىن بۇزعان ازاماتتار قازاقستان رەسپۋبليكاسىنىڭ زاڭنامالارىنا سايكەس اكىمشىلىك جاۋاپقا تارتىلادى.

اتاپ وتسەك، سارىوزەكتەگى كارانتين 17 ساۋىردەن 18-ىنە قاراعان تۇنگى ساعات 00.00-دەن 1 مامىرعا دەيىن سوزىلادى دەپ بەلگىلەنگەن.

ەستەرىڭىزگە سالساق بۇعان دەيىن جۇرتشىلىق 11 ءساۋىر كۇنى ساعات  21:00-دا بىرىككەن اراب امىرلىكتەرىندە كارانتيندە بولعان  135 جولاۋشىنىڭ تالدىقورعان اۋەجايىنا كەلىپ قونعاندىعىنا نارازىلىقتارىن ءبىلدىرىپ، ەلىمىز بويىنشا كوروناۆيرۋستىڭ تارالۋى ءبىرشاما از ايماققا قاتەر ءتونۋى مۇمكىن دەپ قاۋىپتەنگەن بولاتىن.

ايگەرىم باتىرحانوۆا

"The Qazaq Times"