پرەزيدەنت قاسىم-جومارت توقاەۆ كونستيتۋتسيالىق كەڭەسكە ءوتىنىش ءتۇسىردى.

ءساۋىر ايىنىڭ 23-ءى كۇنى كونستيتۋتسيالىق كەڭەس مەملەكەت باسشىسى قاسىم-جومارت توقاەۆتىڭ ءوتىنىشىن قاراۋعا كىرىسكەنىن مالىمدەدى. كەڭەس ءباسپاسوز قىزمەتىنىڭ مالىمەتىنشە، توقاەۆ اتا زاڭداعى 41 بابتىڭ 2-ءشى تارماعىنا تۇسىنىكتەمە بەرۋدى سۇراعان.

اتاپ ايتقاندا مەملەكەت باسشىسى پرەزيدەنتتىككە ۇمىتەر كانديداتتارعا قويىلاتىن تالاپتاردىڭ «ۇمىتكەر قازاقستاندا ون بەس جىلدان ارتىق ۋاقىت تۇرۋى ءتيىس» - دەگەن بولىگىنە تۇسىنىكتەمە بەرۋدى وتىنگەن. وتىنىشتە پرەزيدەنت «قازاقستان اتىنان شەتەلدەردە جۇمىس ىستەگەن ۋاقىت ءوتىلىمى قويىلعان تالاپ مەرزىمىنە قوسىپ ەسەپتەلە مە؟» دەگەن سۇراققا جاۋاپ بەرۋدى سۇراعان.

قازاقستان رەسپۋبليكاسى كونستيتۋتسياسىنىڭ 41 بابىنىڭ 2-ءشى تارماعىندا:

«قازاقستان رەسپۋبليكاسىنىڭ پرەزيدەنتى بولىپ تۋمىسىنان رەسپۋبليكا ازاماتى بولىپ تابىلاتىن، قىرىق جاسقا تولعان، مەملەكەتتىك ءتىلدى ەركىن مەڭگەرگەن، قازاقستاندا سوڭعى ون بەس جىل بويى تۇراتىن جانە جوعارى ءبىلىمى بار رەسپۋبليكا ازاماتى سايلانا الادى. كونستيتۋتسيالىق زاڭدا رەسپۋبليكا پرەزيدەنتتىگىنە كانديداتتارعا قوسىمشا تالاپتار بەلگىلەنۋى مۇمكىن» - دەلىنگەن.

ەستەرىڭىزگە سالايىق، بۇعان دەيىن حالىق اراسىندا «قاسىم-جومارت توقاەۆ زاڭ بويىنشا پرەزيدەنت سايلاۋىنا قاتىسا المايدى. سەبەبى ونىڭ قازاقستان اۋماعىندا تۇرۋ مەرزىمى كونستيتۋتسيادا كورسەتىلگەن تالاپتارعا سايكەس كەلمەيدى» - دەگەن ماسەلە قىزۋ تالقىلانعان.

بۇگىن  «نۇر وتان» پارتياسىنىڭ قۇرىلتايىندا قر تۇڭعىش پرەزيدەنتى نۇرسۇلتان نازارباەۆ ماۋسىمنىڭ 9-ى كۇنى وتەتىن كەزەكتەن تىس پرەزيدەنت سايلاۋىنا پارتيا اتىنان قاسىم-جومارت توقاەۆتىڭ كانديداتۋراسىن ۇسىناتىنىن مالىمدەدى. كەيىننەن ونىڭ بۇل ۇسىنىسىن پارتيا مۇشەلەرى ءبىر اۋىزدان ماقۇلدادى.

"The Qazaq Times"