ميانمادا قىرعىنشىلىققا ۇشىراعان مۇسىلماندار. فوتو: golosislama.

وسىعان دەيىن ميانما ەلىنىڭ قارۋلى كۇشتەرى روحيندجا مۇسىلماندارىنا جاسالعان قىرعىننان 400 ادامنىڭ ولتىرىلگەنىن، ولاردىڭ باسىم كوبى تەررورلىق توپتىڭ مۇشەلەرى ەكەنىن ايتقان ەدى. بىراق، جاقىندا شەكاراسىز دارىگەرلەر ۇيىمى تەكسەرىپ، انىقتاۋ جۇمىسىنىڭ ناتيجەسىن جاريالاپ، ميانما رەسميلەرىنىڭ مالىمەتىن تەرىسكە شىعاردى. بۇل تۋرالى BBC-ءدىڭ رەسمي سايتى حابارلادى.

اتالعان ۇيىم بانگلادەشكە باس ساۋعالاعان روحينجالاردىڭ سانىن 647 مىڭ ادام دەپ تۇراقتاندىرعان. سونىمەن بىرگە ۇيىم تەكسەرۋ ارقىلى 25 تامىز بەن 24 قىركۇيەك ارالىعىندا 9 مىڭ روحيندجا مۇسىلمانىنىڭ قازا بولعانىن انىقتادى. ونىڭ ىشىندە 730 بالانى قامتىعان 6700 ادام ميانما قارۋلى كۇشتەرىنىڭ قولىنان قازا تاپقان. قالعانى بانگلادەش پەن ميانما شەكاراسىندا سۋعا كەتكەن، اۋىرۋدان نەمەسە ءتۇرلى سەبەپتەرمەن كوز جۇمعان.

جۋرناليستەردىڭ بوسقىندارمەن بولعان سۇحباتتارىندا ادام قۇقىقتارىنىڭ اۋىر دارەجەدە بۇزىلعانى تۋرالى انىق مالىمەتتەر بار. روحيندجا مۇسىلماندارىنىڭ قاۋىپسىزدىك قىزمەتكەرلەرى جاعىنان زورلىق-زومبىلىققا ۇشىراعانى تۋرالى دا مالىمەتتەر كوپتەپ تابىلادى. بوسقىنداردىڭ ءبارى دەرلىك زۇلىمدىق ارەكەتتەردەن ۇرەيلەنىپ، بانگلادەشكە ەرىكسىز جانساۋعالاعانىن ايتادى.

شەكاراسىز دارىگەرلەر ۇيىمى ميانما ارمياسىنىڭ قارۋلى وپەراتسيالارى اسا قاتاڭ جۇرگىزىلگەنىن ايتۋدا. سوندىقتان اتالمىش ۇيىم حالىقارالىق قىلمىستىق سوت ادام قۇقىقتارىنىڭ بۇزىلعانى تۋرالى تەرگەۋ جۇرگىزۋى كەرەك دەپ قارايدى. بىراق ميانما ۇكىمەتى حالىقارالىق سوتتىڭ تەرگەۋىن قابىل الماۋى مۇمكىن.

“The Qazaq Times”