بۇدان 2 جىل بۇرىن 700 مىڭنان استام روحينجا مۇسىلماندارى ميانماداعى اسكەري وپەراتسيالاردان جان ساۋعالاپ قاشىپ، بانگلادەشكە بارعان ەدى. قازىر بانگلادەش جەرىندە ميلليوننان استام روحينجالار بوسقىندار لاگەرىندە ءومىر سۇرۋدە. تامىز روحينجالاردى مەكەندەرىنە قايتارۋ ارەكەتى تاعى دا ىسكە اسپاي قالدى. ولار ميانما جەرىنە بارساق تاعى دا قىرعىنعا ۇشىرايمىز دەپ قورقادى.

ميانما ۇكىمەتى وسىدان بۇرىن روحينجالاردى قابىل الۋعا دايىن ەكەنىن بىلدىرگەن. الايدا، BBC-ءدىڭ انىقتاۋىنشا، ميانما اسكەريلەرى راكحاين ايماعىنداعى روحينجالاردىڭ مەكەنىن بۇتىندەي وزگەرتىپ، ولار جاساعان اۋىلداردى ءتۇپ-تامىرىمەن جوق قىلاۋدا.

قازىر ميانمانىڭ كوشى-قون پوليتسياسى شەتەلدىك جۋرناليستەرگە بوسقىنداردى قابىلداۋعا دايىن ەكەنىن كورسەتۋگە تىرىسىپ جاتىر. الايدا، ميانما تارابىنان قۇرىلعان جاڭا «ترانزيت لاگەرلەرىنىڭ» جاعدايى تىم ناشار. ونىڭ ۇستىنە لاگەرلەر سىم تورلارمەنەن قورشالىپ، قاراۋىل مۇناراسى ورناتىلعان. لاگەر ماڭىن قارۋلى اسكەرلەر كۇزەتىپ جۇرەدى.

بانگلادەشتەگى لاگەرلەردە جاساپ جاتقان روحينجا مۇسىلماندارى ميانما شەكاراسىنان وتۋدەن قورقادى. ولار ونداعى بولاشاعىنىڭ نە بولاتىنىن انىق بىلمەيدى. قايتالاي قىرعىنشىلىققا ۇشىرايمىز دەپ ۇرەيلەنەدى. ونىڭ ۇستىنە ميانما ۇكىمەتى روحينجالارعا جاسالعان قىرعىنشىلىقتى انىقتاۋ، قىلمىستىلاردى جازالاۋعا جانە ولاردىڭ بولاشاعىنا انىق كەپىلدىك تە بەرگەن جوق.

ميانما ۇكىمەتىنىڭ قۇرىپ جاتقان لاگەرلەرى ءجۇز مىڭداعان مۇسىلماننىڭ جاساۋىنا ەمەس، كەرىسىنشە ولاردىڭ ەركىندىگىن شەكتەپ، باقىلاۋدا ۇستاۋعا جاسالعانى انىق بايقالادى. BBC ءتىلشىسى ميانماداعى جاعدايدى تانىستىرا وتىرىپ، «بۇل جەرگە مۇسىلماندار ەشقاشان قايتىپ كەلمەسى انىق» دەپ تۇيىندەيدى.

“The Qazaq Times”