روحيندجا مۇسىلماندارىنىڭ نارازىلىق شاراسى. فوتو: BBC.

كەشە ون مىڭداعان روحيندجا مۇسىلماندارى نارازىلىق اكتسياسىن وتكىزدى. ولار بۇل كۇندى "گەنوتسيدتى ەسكە الۋ كۇنى" دەپ بەلگىلەگەن. بانگلادەشتەگى بوسقىندار لاگەرىن پانالاعان روحيندجالار ميانما قارۋلى كۇشتەرى تارابىنان جاسالعان قىرعىنشىلىق كەزدە قازا تاپقان جاقىندارىن ەسكە الدى. 

روحيندجالار باسپانا ەتكەن بانگلادەشتەگى بوسقىندار لاگەرى قازىرگى كەزدە الەمدەگى ەڭ ۇلكەن بوسقىن لاگەرى سانالادى. ميلليوننان استام روحيندجا مۇسىلماندارىن ەلىنە قابىلداۋعا بانگلادەشتىڭ ءال-اۋقاتى كوتەرمەيدى. سەبەبى، بانگلادەش الەمدەگى ەڭ كەدەي ەلدەردىڭ قاتارىندا. ال، روحيندجالار ميانماداعى مەكەندەرىنە قايتۋدى قالامايدى. ولار ميانماعا قايتىپ بارسا قاقتىعىس قايتالانۋى مۇمكىن.

ءيىن تىرەسە سىعىلىسقان لاگەرلەردە ءومىر ءسۇرىپ جاتقان روحيندجالار وڭىردەگى باستى داعدارىستىڭ ءبىرى رەتىندە بەلگىلى. شارت-جاعدايى تومەن لاگەر ومىرىندە جاساعان ايەلدەر مەن بالالار ءتۇرلى اۋرۋلاردان زارداپ شەگۋدە. قازىر تەك حالىقارالىق الەۋمەتتىك كومەكپەن عانا ءومىر ءسۇرىپ جاتقان ولار الەمنەن ادىلەتتىلىك تالاپ ەتىپ، اۋقىمدى نارازىلىق اكتسياسىن وتكىزگەن.

“The Qazaq Times”