فوتو: bbc.com

ۆەنەسۋەلادا ءساۋىر ايىنان بەرى جالعاسىپ كەلە جاتقان ساياسي داعدارىس، وپپوزيتسيا مەن بيلىك اراسىنداعى تەكە-تىرەس ەلگە جاڭا ەكونوميكالىق سانكتسيالار، الەم نارازىلىعى مەن ىشكى تۇراقسىزدىقتى الىپ كەلدى. الەۋمەتتىك جاعدايدىڭ تومەندەۋى ەل ىشىندەگى قىلمىس پەن زورلىق-زومبىلىقتىڭ ارتۋىنا سەبەپ بولىپ وتىر. ۆۆس ءتىلشىسى كاراكاستا تۇراتىن ۆەنەسۋەلالىق قاريالارمەن بولعان اڭگىمەسى ارقىلى بۇكىل مەملەكەتتەگى جاعدايدى سيپاتتاپ جازادى. 

يزابەل دۋبۋك - 87 جاستاعى زەينەتكەر. ول ءوزىنىڭ 66 جاستاعى قىزى كاريسپەن بىرگە تۇرادى. قالعان بالالارى مەن نەمەرەلەرى ەۋروپا مەن امەريكاعا قونىس اۋدارعان. سوڭعى ۇلى ۆەنەسۋەلاداعى داعدارىس شيەلەنىسپەي تۇرىپ، بىرنەشە اي بۇرىن وتانىنان ءىزىن سۋىتىپتى. قارت انا بالالارىنىڭ بەيبىتشىلىك ورناعان،  ومىر ساپاسى جوعارى ەلدەرگە كەتىپ ۇلگەرگەنىنە قۋانادى.

1952-1958 جىلدارى ۆەنەسۋەلانى باسقارعان ديكتاتور پەرەس حيمەنەستىڭ كوزىن كورگەن اجەي، قاتاڭ باسشىنىڭ تۇسىندا دا مۇنداي قيىندىققا ۇشىراسپاعانىن ايتادى. ء"بىز كۇن وتكەن سايىن ءوز ءۇيىمىزدىڭ قابىرعاسىنا تۇرمەگە جابىلعانداي تۇتقىن بولا باستادىق. ۇيدەن تەك دۇكەنگە نە جۇمىسقا شىعامىز. اسا ماڭىزدى سەبەپپەن بولماسا، كوشەگە ەركىن شىعۋ وتە قاۋىپتى. ەسىكتەرىمىزگە بەرىك قۇلىپتار ورناتتىق", - دەيدى.

ۇكىمەت ەلدەگى قىلمىس ستاتيستيكاسىن جاريالاۋدى توقتاتقاننان كەيىن، 2016 جىلى Venezuelan Violence Observatory قوعامدىق ۇيىمى 28 مىڭ 479 ادام زورلىقپەن ولتىرىلگەنىن حابارلاعان بولاتىن. بۇل ءار 100 مىڭ تۇرعىننىڭ 92-ءسى دەگەن ءسوز.

ءبۇتىن عۇمىرىن اۋە بيلەتتەرىن تەكسەرۋشى قىزمەتىنە ارناعان كاريس زەينەتكە شىققان سوڭ، اعىلشىن ءتىلىن وقۋعا بەل بايلاعان. ول اعىلشىن تىلىندە سويلەيتىن ەلدەرگە ساياحاتتاۋدى ارمان ەتەدى. بىراق ۆەنەسۋەلادا كەلەسى جىلى 2,300% شارىقتايدى دەپ كۇتىلگەن ينفلياتسيامەن شەت ەلگە شىعۋ اسا قىمباتقا تۇسەتىنىن ايتۋدىڭ ءوزى ارتىق. ءوزىنىڭ قارتتىعى وسىنداي اۋىر ءارى كوڭىلسىز بولاتىنىن ەشقاشان ويعا الماعانىن جەتكىزگەن قاريالار اۋىر كۇرسىنىپ قويدى.

يزابەل ءوز اتا-اناسىنىڭ قارتتىق شاعى بالالارىنىڭ ورتاسىندا قامسىز ءارى باقىتتى وتكەنىن ساعىنىشپەن ەسكە الادى. ء"بىزدىڭ قارتتىق شاعىمىزدىڭ بەرەكەسى قاشتى", - دەيدى ول.

“The Qazaq Times”