قۇراما شتاتتار ۆەنەسۋەلا وپپوزيتسياسىن قولداۋعا 40 ميلليوننان استام دوللار بولەدى. نەگىزى بۇل قاراجات ورتالىق امەريكاعا گۋمانيتارلىق كومەك رەتىندە بەرىلمەك.

حالىقارالىق دامۋ اگەنتتىگىنىڭ كونگرەسكە جولداعان قىزمەتتىك حاتىن "The Los Angeles Times" گازەتى جاريالادى.

وندا "40 ميلليون دوللار وپپوزيتسيا ليدەرى حۋان گۋايدونىڭ كومانداسىنا بەرىلەدى. اقشا وپپوزيتسيالىق شتاب قىزمەتكەرلەرىنە ايلىق رەتىندە، ءىس ساپارلارىنا، دەموكراتيالىق باسقارۋ جانە سايلاۋ كامپانياسىن جۇرگىزۋ تەحنولوگيالارى بويىنشا سەمينارلار ۇيىمداستىرۋ ءۇشىن جۇمسالادى" دەلىنگەن.

​دونالد ترامپ جانە ونىڭ ۇلتتىق قاۋىپسىزدىك بويىنشا كومەكشىسى جون بولتون كاراكاستىڭ رەسمي ۇكىمەتىن “نيكولاس مادۋرونىڭ بۇرىنعى رەجيمى" دەپ اتايدى. اقش، ەۋروپانىڭ كوپ ولكەلەرى جانە لاتىن امەريكا گۋايدونى ۆەنەسۋەلانىڭ زاڭدى ۋاقىتشا پرەزيدەنتى رەتىندە تانىعان. ۆاشينگتون ۆەنەسۋەلالىق قاشقىنداردى كورشى ەلدەرگە جايعاستىرۋ بويىنشا ءىرى قاراجات جۇمسادى. ۆەنەسۋەلانىڭ اقش-تاعى كونسۋلدىقتارىندا مادۋرو تارابىنان تاعايىنداعان ديپلوماتتار گۋايدونى جاقتاعاندارمەن الماستىرىلىپ جاتىر.

42 ميلليون دوللاردى ورتالىق امەريكاداعى ءۇش ولكەنىڭ ەكەۋى – گۆاتەمالا مەن گوندۋراس الماق. بۇل ەلدەردە قۇراما شتاتتارعا كەتۋدى قالايتىندار كوپ. سەبەبى، ولكەدە زورلىق-زومبىلىق كەڭ ەتەك العان.

ۆاشينگتون وتكەن جىلى ورتالىق امەريكاعا گۋمانيتارلىق جاردەم رەتىندە 370 ميلليون دوللار بولگەن. دونالد ترامپ ەگەر جەرگىلىكتى بيلىك ميگراتسيا اعىمىن توقتاتپاسا، جاردەم بەرىلمەيتىنىن ەسكەرتكەن.

"The Qazaq Times"