ساۋد ارابياسى قاۋىپسىزدىك قىزمەتكەرلەرىنىڭ اراسىنان شەتەل تىڭشىلارىن ۇستادى

ساۋد ارابياسىنىڭ رەسمي وكىلدەرى سەيسەنبىدە جاساعان مالىمەتىندە، سول ەلدىڭ قاۋىپسىزدىك كۇشتەرى «يسلام مەملەكەتتەرى» تەرروريستىك توبىنىڭ قورعانىس مينيسترلىگىنىڭ عيماراتىنا باعىتتالعان لاڭكەستىك شابۋىلىن الدىن العانىن حابارلادى. سونىمەن بىرگە، تەررورلىق توبىنىڭ تىڭشىلارى دەپ تانىلعان كۇدىكتى ادامداردى تۇتقىنداعانىن ايتتى. ەلدىڭ قورعانىس وكىلدەرى تاراتقان مالىمەتتە بۇل ەكى جاعدايدىڭ ءبىر-بىرىمەن قاتىسى بار جوعى انىق ايتىلماعان.  بۇل تۋرالى «شينحۋانىڭ» رەسمي سايتى جازدى.

اتالعان ەلدىڭ قاۋىپسىزدىك قىزمەتكەرىنىڭ ءبىرى ەلدىڭ اقپاراتتىق اگەنتتىگىنىڭ جۋرناليستەرىنە بەرگەن مالىمەتكە قاراعاندا، پوليتسيا تاراپىنان ءتورت كۇدىكتى قاماۋعا الىنعان. ونىڭ ىشىندە ساۋد ارابياسىندا جالعان اتپەن كىرگەن يەمەندىك ەكى ازامات تا بار. قولعا الىنعان كۇدىكتىلەردىڭ جارىلعىشتاردى جانە جارىلعىش ورناتىلعان كيىمدەردى جاساعانى انىقتالدى. بۇل ارەكەتتەرىنە قاراپ، ولارعا ساۋد ەلىنىڭ  قورعانىس مينيسترلىگىنىڭ عيماراتىنا شابۋىل جاساماق بولعان دەگەن كۇدىك تاعىلعان. رەيدتىك پوليتسيا قىزمەتكەرلەرى، سونداي-اق، گراناتالار مەن باسقا دا قارۋ-جاراقتى قولعا تۇسىرگەن.

سوڭعى جىلدارى «يسلام مەملەكەتى» ۇيىمى ساۋد ارابياسىنىڭ امەريكا قۇراما شتاتتارىمەن وداقتاستىعىن بىرنەشە رەت ايىپتادى. سونىمەن بىرگە ساۋد ارابياسى قورعانىس جانە قاۋىپسىزدىك بولىمىمەن شيت مۇسىلماندارىنا قارسى زىمىران جانە بومبالى شابۋىلدار ۇيىمداستىردى.

اتالعان ەلدىڭ اقپارات اگەنتتىگى قاۋىپسىزدىك ءبولىمىنىڭ جاسىرىن دەرەككوزدەرىنە سىلتەمە جاساي وتىرىپ، ساۋد ارابياسى قورعانىس تاراۋلارى جاقىندا ءوز ىشىندەگى تىڭشىلىق جۇيەنى تالقانداعانىن مالىمدەدى. بۇل تىڭشىلىق جۇيەسى شەتەلدىكتەرگە سول ەلدىڭ قورعانىس قۇپيالارىن اشىپ بەرەدى دەگەن ايىپتار تاعىلعان.

رەسمي وكىلدەردىڭ ءبىرى Reuters اگەنتتىگىنە بەرگەن حابارىندا، بۇل بىرنەشە كۇدىكتىنىڭ شەتەلگە قۇپيا اقپارات جەتكىزەتىنىن، سونىڭ ىشىندە «مۇسىلمان باۋىرلاستار» ۇيىمى دا بار ەكەنىن ايتقان. ساۋدتىڭ اراب ەلى 2014 جىلدىڭ ناۋرىز ايىندا «مۇسىلمان باۋىرلاستار» ۇيىمىن تەرروريستىك ۇيىم رەتىندە تانيتىنىن مالىمدەدى. ال، بيىل ماۋسىم ايىندا ساۋد ارابياسى باستاعان بىرقاتار اراب ەلدەرى اتالعان ۇيىمدى قارجىلاندىردى دەپ ايىپتاپ، كاتارمەن ديپلوماتيالىق قارىم-قاتىناسىن ۇزگەن بولاتىن.

سونداي-اق، كۇدىكتىلەر «تىڭشىلىق جۇيە باسقا ەكى ەلمەن بايلانىسقا شىقتى، سول ەلدەردىڭ قارجىلىق جانە باسقا دا قولداۋ تۇرلەرىن قابىلداي وتىرىپ، ساۋد ارابياسىنىڭ مۇددەلەرىنە زيان كەلتىردى» دەپ ايىپتالدى. تەرگەۋ ءالى دە جالعاسۋدا. سوندىقتان، تىڭشىلاردىڭ استاسقان ەلدەرى تۋرالى ءتىزىم ءالى دە جاريا ەتىلمەدى. دەگەنمەن اقپارات كوزدەرىنىڭ ايتۋىنشا، كۇدىكتىلەردىڭ ءبىرى يەمەندەگى گۋسسەر قارۋلى كۇشتەرىنىڭ مۇشەسى بولىپ شىققان.

“The Qazaq Times”