پولشادا «رەسەي تىڭشىسى» دەگەن ايىپپەن ۇستالعاندار كوبەيدى

پولشا ارنايى قىزمەتى تىڭشىلىق ايىبىمەن ءبىر رەسەيلىك جانە ءبىر بەلارۋس ازاماتىن تۇتقىنداعانىن مالىمدەدى. العاشقى رەسمي مالىمەتتەردە ەكى ازاماتقا پولشا-بەلارۋس شەكاراسىنداعى اسكەري ورنالاسۋ بويىنشا مالىمەت جينادى دەگەن كۇدىك تاعىلعان. ەگەر، ەكى ازاماتقا قاتىستى بۇل ايىپ دالەلدەنسە ون جىلعا باس بوستاندىعىنان ايىرىلۋى مۇمكىن.

پولشا ەو ەلدەرى اراسىندا ۋكراينامەن ەڭ تىعىز مامىلە-بايلانىستاعى ەل. وداق ىشىندە ۋكراينانىڭ مۇددەسىن كوبىرەك كوتەرگەنى جانە بەلگىلى. ال، رەسەي ۋكرايناعا باسىپ كىرگەننەن بەرى پولشا ەڭ كوپ ۋكراينالىق بوسقىنداردى قابىلدادى. بۇعان قوسا ۋكرايناعا جەتىپ جاتقان اسكەري جانە الەۋمەتتىك كومەكتەردىڭ باسىم كوبى وسى پولياك جەرى ارقىلى ۋكرايناعا كىرەدى.

ەستەرىڭىزدە بولسا، ناۋرىز ايىندا ۆارشاۆا بيلىگى تىڭشىلىق جاسادى دەگەن ايىپپەن 45 رەسەيلىك ديپلوماتتى ەلدەن شىعارعان بولاتىن. ال، BBC-ءدىڭ پولشاداعى قىزمەتى جازعانداي، رەسەي ۋكرايناعا باسىپ كىرگەننەن بەرى، ەلدە «رەسەي تىڭشىسى» دەگەن كۇدىكپەن ۇستالعاندار كوبەيگەن. ءساۋىردىڭ وزىندە وسىنداي ايىپپەن رەسەي جانە بەلارۋس ازاماتتارىنان 5 ادام تۇتقىندالعان.

17 ناۋرىزدا پولشا تىڭشىلىق ايىبىمەن 45 رەسەيلىك ديپلوماتتى ەلدەن قۋا وتىرىپ، بۇل شەشىمدى «رەسەيدىڭ پولشا رەسپۋبليكاسى جانە ونىڭ وداقتاستارىنا قاراتقان ساياساتى، ءارى ۋكرايناعا جاساعا اگرەسسياسىنا بايلانىستى» قابىلداعاندارىن ايتقان. بۇل دەگەنىمىز رەسەيدىڭ ديپلوماتيالىق قىزمەتى ءۇشىن ەڭ اۋىر ايىپتاردىڭ ءبىرى.

پولشا ورىس ديپلوماتتارىنا تاعىلعان ايىپتى تىڭشىلىق بويىنشا پولشالىق ازاماتتى تەرگەۋ كەزىندە انىقتاعانىن دا قوسا ءبىلدىرىپ ەدى. ياعني، ەلدىڭ ىشكى قاۋىپسىزدىك قىزمەتى پولشا ازاماتىن وسى ايىپ بويىنشا تەرگەۋ بارىسىندا رەسەي ديپلوماتتارىنىڭ قاتىسى بارى انىقتالعان.

ايتا كەتۋ كەرەك، سوڭعى جىلدارى ۆارشاۆا مەن ماسكەۋ اراسىنداعى مامىلە سالقىنداپ، «ديپلوماتيالىق ءوش الۋ» ارەكەتتەرى ءجيى قايتالاندى.

The Qazaq Times