تالدىقورعان قالاسىندا تۇرعىن ءۇي كەزەگىندە تۇرعاندار مەن «تۇرعىن ءۇي قۇرىلىس جيناق بانكى» اق-نىڭ سالىمشىلارىنا جاڭا كوپقاباتتى ۇيلەردىڭ 168 پاتەرى بەرىلدى. مەملەكەتتىك «نۇرلى جول» باعدارلاماسىمەن سالىنعان نەسيەلىك تۇرعىن ۇيلەردىڭ كىلتىن وبلىس اكىمى اماندىق باتالوۆ پەن «قازاقستاننىڭ تۇرعىن ءۇي جيناق بانكى» اق باسقارما ءتورايىمى ءلاززات يبراگيموۆا تابىستادى، دەپ حابارلايدى الماتى وبلىسى اكىمىنىڭ ءباسپاسوز قىزمەتى.

قونىس يەلەرىن قۇتتىقتاعان وبلىس اكىمى ا. باتالوۆ تالدىقورعان قالاسىن دامىتۋدىڭ جوسپارىنا، سونىڭ ىشىندە 7-شاعىن اۋداندا سالىناتىن قۇرىلىس نىساندارىنا قىسقاشا توقتالىپ، جاڭا باسپانالارىنا قۇتتى بولسىن ايتتى. «قازاقستاننىڭ تۇرعىن ءۇي قۇرىلىس جيناق بانكى» اق باسقارما ءتورايىمى ءلاززات يبراگيموۆا جەكە تۇرعىن ءۇي قۇرىلىسىن دامىتۋ تۋرالى ءوزارا ىنتىماقتاستىق مەموراندۋمىنا قول قويدى.

ل. يبراگيموۆانىڭ ايتۋىنشا، «نۇرلى جەر» باعدارلاماسى شەڭبەرىندە قوس تاراپ كەلىسىمى بويىنشا جىل سوڭىنا دەيىن تالدىقورعاندا بانكتىڭ قاتىسۋىمەن كوتتەدجدى قالاشىقتا 48 جەر ءۇي سالىنىپ، پايدالانۋعا بەرىلەدى دەپ جوسپارلانىپ وتىر. ال مۇنان كەيىنگى ەكى جىل ىشىندە وسىنداي جەكە تۇرعىن ۇيلەر سانىن 600-گە جەتكىزۋ مەجەلەنگەن.

وبلىس اكىمدىگىنىڭ مالىمەتىنشە، «تۇرعىن ءۇي قۇرىلىس جيناق بانكى» اق وڭىرلەردى دامىتۋدىڭ 2020 جىلعا دەيىنگى باعدارلاماسى شەڭبەرىندە وبلىستا 74,1 مىڭ شارشى مەتر تۇرعىن ءۇي سالعان. سونىڭ ىشىندە «تۇرعىنداردىڭ بارلىق ساناتىنا ارنالعان تۇرعىن ءۇي» باعىتى بويىنشا 41,1 مىڭ شارشى مەترلىك 12 ءۇي نەمەسە 609 پاتەر سالىنسا، «جاس وتباسىلارعا ارنالعان تۇرعىن ءۇي» باعىتى بويىنشا 33 مىڭ شارشى مەترلىك 7 ءۇي نەمەسە 593 پاتەر پايدالانۋعا بەرىلگەن. جالپى 2017 جىلى 6 ءۇي سالۋ جوسپارلانسا، سونىڭ 4-ەۋى تالدىقورعاندا بولماق.

“The Qazaq Times”