فوتو: Pravda.ru

پەنتاگونداعى بىرقاتار باسقارۋشى پوزيتسيالاردىڭ بوس تۇرۋى قورعانىس سالاسىندا ءونىم شىعارۋمەن اينالىساتىن كومپانيالاردىڭ جۇمىسىن تەجەپ وتىر. بۇل تۋرالى ولار جىل سايىنعى اسكەري كومپانيالاردىڭ  باسقوسۋىندا مالىمدەدى. اتالعان اقپارات Reuters اقپاراتتىق اگەنتتىگى سايتىندا جاريالاندى.

اسكەري كومپانيا باسشىلارى ءوز پىكىرىندە اقش پرەزيدەنتى دونالد ترامپتى تىكەلەي ايىپتاماسا دا، پەنتاگونداعى باسشىلىق قىزمەت ورىندارىنا جاڭا جۇمىسكەرلەر تاعايىنداۋ پروتسەسىنىڭ ۇزاققا سوزىلۋى قورعانىس سالاسىنداعى كاسىپورىنداردى جاڭا كەلىسىمشارتتار مەن كەلەر جىلعى نارىقتى بولجاۋدان قالدىرىپ وتىرعانىن جەتكىزدى.

قورعانىس مينيسترلىگىنىڭ مالىمەتىنشە، قازىر پەنتاگوندا اسكەري-تەڭىز فلوتى ءمينيسترىنىڭ ورىنباسارى، باس حاتشى، باس ينسپەكتور سىندى 42 قىزمەت ورنى بوس تۇر. ولاردىڭ 13-نە كانديداتتار بار، قالعان 23 ورىنعا تالاسىپ وتىرعان ازاماتتار جوق. بۇل قىزمەتتەرگە لايىقتى ادامداردى سەنات بەكىتەدى.

اق ءۇيدىڭ رەسمي وكىلى: "سەناتتىڭ بەرىلگەن كانديداتتاردى ۋاقىتىلى بەكىتۋىنە دەموكراتتاردىڭ قارسىلىعى كەدەرگى بولدى", - دەپ مالىمدەدى.

اقش-تىڭ اسكەري كۇشتەرىنە قارۋ-جاراق جەتكىزەتىن كومپانيالاردىڭ ءبىرى سەناتتىڭ جۇمىسىن باياۋ اتقارۋى قورعانىس تەحنيكالارىن وندىرەتىن كومپانيالاردى ۇكىمەتپەن جاسالاتىن ءىرى كەلىسىمشارتتاردان ايىرىپ وتىرعانىن ايتادى.

“The Qazaq Times”