اقش پەن ۋكراينا اراسىنداعى تاريحي كەزدەسۋ. فوتو: Reuters

بىرەر كۇن بۇرىن اقش پەن ۋكراينا ورتاسىندا جوعارى دەڭگەيدە كەزدەسۋ ءوتتى. كەزدەسۋ قوس تاراپتىڭ جوعارى ەڭ جوعارى لاۋازىمدى وكىلدەرىنىڭ قاتىسۋىمەن ءوتتى. مەملەكەتتىك حاتشى بلينكەن باستاپ كەلگەن اقش دەلەگاتسياسىنىڭ قۇرامىندا پەنتاگوننىڭ قازىرگى جەتەكشىسى لويت وستين دە بار. ال، ولاردى قارسى الىپ شىققان پرەزيدەنت زەلەنسكي مەن ونىڭ ۇكىمەتىنىڭ ءسىم جەتەكشىسى جانە قورعانىس مينيسترلەرى بولدى.

ءدال وسى كەزدەسۋدە اقش جوعارى لاۋازىمدىلارى رەسەيگە قاتىستى وزدەرىنىڭ ناقتى ماقساتتارىن اشىق ايتقانداي بولدى. ايتالىق، اقش قورعانىس ءمينيسترى وستين كەزدەسۋدەن كەيىن پولشادا جاساعان مالىمدەمەسىندە: «ۋكراينا دۇرىس قولداۋ كورسەتىلسە بولىپ جاتقان سوعىستا جەڭىپ شىعۋىنا زور مۇمكىندىك بار»، – دەدى، ءارى: «رەسەي ۋكرايناعا باسىپ كىرۋدەي ارەكەتتى قايتالاي المايتىنداي دەڭگەيدە السىرەۋىن ءۇمىت ەتەمىز»، – دەگەن پىكىرىن ايتتى.

بىرقاتار ءىرى اقپارات قۇرالدارى جانە اقپارات وكىلدەرى ءوستيننىڭ وسى سوزىنە كوبىرەك ءمان بەردى. بىلايشا ايتقاندا بۇل كەزدەسۋدە اقش-تىڭ رەسەيدى السىرەتۋگە دەگەن شاقىرۋى بۇرىنعىدان كورى انىق ەستىلە باستادى. بۇل جونىندە پەنتاگون باسشىسى: «ۋكرايناعا كومەك بەرۋ – بۇل ءبىر بولەك تە، رەسەيدى السىرەتۋ – مۇلدە باسقا ماسەلە»، – دەپ كورسەتكەن. ونىڭ بۇل ءسوزى رەسەي پرەزيدەنتى ءپۋتيننىڭ شامىنا ءتيىپ، دۇيسەنبى كۇنگى جاۋابىندا: «باتىس ەلدەرى رەسەيدى بولشەكتەۋگە ارەكەت ەتىپ جاتىر»، – دەپ ايىپتادى.

اقش پەن وزگە باتىس ەلدەر تاراپىنان جاقىن ارادا 713 ميلليون اقش دوللارى كولەمىندە اسكەري كومەك جاسالعالى جاتىر. اقش تارابىنان ۋكرايناعا جاسالاتىن جاڭا اسكەري كومەكتىڭ كولەمى 332 ميلليون دوللاردى قۇايدى. بۇل سومانى قوسساق، رەسەي ۋكرايناعا باسىپ كىرگەننەن بەرى اقش كيەۆتى قولداپ 3,7 ميلليارد دوللار كولەمىندە قارجى شىعاردى.

سوڭعى ۋاقىتتا ۋكراينا پرەزيدەنتى زەلەنسكي باتىس ەلدەرىنەن ۇشاقتار مەن اسكەري تاسىمال كولىكتەرى كوبىرەك بەرىلەتىن بولسا رەسەي قارۋلى كۇشتەرىن جەڭىپ شىعا الاتىندارىن كوبىرەك ايتىپ كەلەدى. قازىردىڭ وزىندە اقش پەن كانادا ۋكراينا قارۋلى كۇشتەرىنە 30 شاقىرىمعا، ءتىپتى 50 شاقىرىمداعى نىساناعا ءدال سوققى جاسايتىن ارتيللەريالىق قۇرالدارىن بەرىپ جاتىر. اقش پەن وزگە باتىستىڭ اسكەري قولداۋى كۇشەيگەن سايىن ماسكەۋ وعان قارسى ديپلوماتيالىق نوتا دا جولداي باستادى.

The Qazaq Times