پول كاگامە رۋاندانىڭ پرەزيدەنتى بولىپ قايتا سايلاندى

پول كاگامە وسىمەن ءۇشىنشى رەت قاتارىنان رۋاندانىڭ پرەزيدەنتى بولىپ سايلاندى. ول سايلاۋدا 98,66 پايىز داۋىس جيناسا، پرەزيدەنتتىككە ۇمىتكەر تاۋەلسىز قاتىسۋشى فيليپپ مپايمانا - 0,72 %، "دەموكراتيالىق جاسىلدار پارتياسىنىڭ" وكىلى فرەنك حابينەزا - 0,45% داۋىس بەرۋشىلەردىڭ قولداۋىنا يە بولعان. بۇل تۋرالى APF اقپاراتتىق اگەنتتىگى جازدى.

پول كاگامە 36 جاسىنان باستاپ رۋاندانىڭ دە-فاكتو كوشباسشىسى بولىپ كەلەدى. 1994 جىلى ونىڭ جاساقتاعان اسكەرى رۋاندادا 800 مىڭ ادامدى قىرىپ، گەنوتسيد جاساعان حۋتۋ ەكسترەميستىك توبىنىڭ تاس-تالقانىن شىعارىپ جەڭگەننەن كەيىن، حالىق ونى وزدەرىنىڭ "قۇتقارۋشى باتىرى" كورەدى. 2000 جىلدان باستاپ رەسمي ورگاننىڭ شەشىمىمەن پرەزيدەنت بولىپ سايلانعانىمەن، 2003 جىلى حالىقتىڭ قاتىسۋىمەن دەموكراتيالىق سايلاۋ ءوتىپ، 95 پايىز داۋىسپەن ول ءوز قىزمەتىندە قالدى. 2013 جىلى وتكەن پرەزيدەنتتىك سايلاۋ كەزىندە تاعى دا سايلاۋشىلاردىڭ 93 پايىزىنىڭ قولداۋىنا يە بولعان پول كاگامە جاڭادان وتكەن سايلاۋ قورىتىندىسى بويىنشا دا، پرەزيدەنتتىك قىزمەتىن جالعاستىرا بەرەتىن بولدى.

پول كاگامە ەلدە قاتاڭ ءتارتىپ ورناتىپ، قاۋىپسىزدىك پەن جىل سايىن 7 پايىزدى قۇرايتىن ەكونوميكالىق ءوسىمدى قامتاماسىز ەتىپ وتىر. دەگەنمەن الەم باسشىلارى ونى ەلدەگى دەموكراتيالىق قۇندىلىقتاردى جانىشتاپ، جەكە باسىنىڭ بيلىگىن كۇشەيتكىسى كەلەتىن ديكتاتور ەسەبىندە تانيدى. وسى تۇستا بيىل سايلاۋ بيۋللەتەندەرىندە وپپوزيتسيا وكىلىنىڭ اتى قانشا جىلدان بەرى بىرىنشە رەت كورىنىس تاپقانىن اتاپ ءوتۋ كەرەك. بەيرەسمي زەرتتەۋلەر مەن دەرەكتەرگە سۇيەنسەك، پول كاگامەنىڭ قارسىلاستارى تۇرمەگە جابىلادى نە ولتىرىلەدى. سول سەبەپتەن بولسا كەرەك، رۋاندادا وعان اشىق قارسى شىعاتىن وپپوزيتسيا جوق.

جەرگىلىكتى كاسىپكەر جان باتيست رۋتايزير: "پول كاگامە ەلدى ازات ەتتى. قازىر ءبىز ەلدىڭ كەز كەلگەن جەرىندە جەكە باسىمىزدىڭ قاۋىپسىزدىگى ءۇشىن الاڭداماي جۇرە الامىز", - دەيدى.

APF اقپاراتتىق اگەنتتىگىنىڭ جۋرناليستەرى رۋاندا حالقىنان پول كاگامەدەن باسقا سايلاۋعا قاتىسقان كانديداتتاردىڭ ەسىمىن سۇراعاندا، كوبى ولاردى تانىمايتىنىن ايتقان.

2015 جىلى وتكەن جالپىحالىقتىق رەفەرەندۋمدا رۋاندالىقتاردىڭ 98 پايىزى كونستيتۋتسياعا وزگەرىس ەنگىزىپ، پول كاگامەگە ءۇشىنشى رەت پرەزيدەنتتىك سايلاۋعا قاتىسۋعا رۇقسات بەرۋ تۋرالى شەشىم قابىلداعان.

رۋاندالىقتاردىڭ  بىرنەشە رەت قاتارىنان ءبىر پرەزيدەنتتى تاڭداپ، ونى "بەيبىتشىلىك ورناتۋشى" كورۋى، تمد ەلدەرىندەگى بىرقاتار مەملەكەتتەردىڭ باسشىلارىن جەرگىلىكتى حالىقتىڭ  "تاۋەلسىزدىك الىپ بەرگەن كوشباسشى" كورەتىن قۇبىلىسىن ەرىكسىز ەسكە سالادى...

“The Qazaq Times”