موڭعوليا حالقى التىنشى پرەزيدەنتىن سايلايدى

موڭعوليادا پرەزيدەنت سايلاۋىنا دايىندىق باستالدى. 9 ماۋسىمدا وتەتىن سايلاۋدا التىنشى پرەزيدەنت بەلگىلى بولادى.

ساياسي دودادا حالىق پارتياسىنىڭ، وپپوزيتسيانىڭ دەموكراتيالىق پارتياسىنىڭ جانە وڭشىلدار كواليتسياسىنىڭ كوشباسشىلارى باق سىناماق. اتاپ ايتقاندا، موڭعول حالىق پارتياسىنان ۋحنااگين حۇرەلسۇح، دەموكراتيالىق پارتياسىنان سودنومزۋندۋين ەردەنە، «دۇرىس ادام ەلەكتوراتى» كواليتسيانان دانگااسۇرەنگين ەنحبات قاتىسادى.

ەل استاناسى ۇلان-باتىردا پرەزيدەنتتىك سايلاۋ الدىنداعى ۇگىت-ناسيحات ناۋقانى كوروناۆيرۋس پاندەمياسىنىڭ سالدارىنان بەلسەندى ۇيىمداستىرىلا المادى. ساراپشىلار ەلدەگى ەپيداحۋالدىڭ ۋشىعۋىنا بايلانىستى سايلاۋعا قاتىسۋ كورسەتكىشى دە تومەن بولۋى مۇمكىن دەپ توپشىلايدى.

موڭعوليادا وسىمەن سەگىزىنشى رەت پرەزيدەنت سايلاۋى وتكىزىلمەك. بۇعان دەيىن 1993, 1997, 2001, 2005, 2009, 2013, 2017 جىلدارى سايلاۋ وتكەن. پرەزيدەنتتى سايلاۋ تۋرالى زاڭعا سايكەس، سايلاۋ ناۋقانى 15 كۇنگە سوزىلادى، بۇل ۋاقىتتا ساياسي پارتيالار مەن كانديداتتارعا تومەندە اتالعانداردان باسقا سايلاۋالدى ۇگىت-ناسيحات جۇرگىزۋگە تىيىم سالىنادى:

- ۇگىت-ناسيحات باسپا ماتەريالدارى سايلاۋشىلار اراسىندا جاپپاي تاراتۋعا ارنالعان;

- تەلەديدار مەن راديودا سايلاۋالدى ۇگىت جۇرگىزۋ;

- سايلاۋ ناۋقانىندا الەۋمەتتىك جەلىنى قولدانۋ;

- كوشەلەر مەن الاڭداردا ۇگىت-ناسيحات پلاكاتىن ورنالاستىرۋ;

- سايلاۋالدى شتاب جۇمىسى.

"The Qazaq Times"