موڭعوليادا التىنشى پرەزيدەنت سايلاندى

موڭعول حالىق پارتياسىنىڭ توراعاسى ۋحنااگين حۋرەلسۋح التىنشى پرەزيدەنت بولىپ سايلاندى.

مونتسامە اگەنتتىگىنىڭ مالىمەتىنشە، حۋرەلسۋح 67,6% داۋىس جيناعان. پارلامەنتتىڭ بۇرىنعى دەپۋتاتى، «شىنشىل ادام – ەلەكتورات» كواليتسياسىنىڭ وكىلى دانگااسۋرەنگين ەنحباتقا سايلاۋشىلاردىڭ 20,2%-ى، وپپوزيتسيالىق باعىتتاعى دەموكراتيالىق پارتيانىڭ بۇرىنعى باسشىسى سودنومزۋندۋين ەردەنگە شامامەن 6%-ى داۋىس بەرگەن.

ەل استاناسى ۇلان-باتىردا پرەزيدەنتتىك سايلاۋ الدىنداعى ۇگىت-ناسيحات ناۋقانى كوروناۆيرۋس پاندەمياسىنىڭ سالدارىنان بەلسەندى ۇيىمداستىرىلمادى. سوعان قاراماستان، سايلاۋعا حالىقتىڭ 52,69%-ى داۋىس بەرگەن.

موڭعول حالىق پارتياسى قازىردىڭ وزىندە ەلدىڭ پارلامەنتى مەن ۇكىمەتىن باسقارادى. ەندى اتالعان پارتيا ەلدەگى بارلىق بيلىكتى يەمدەندى.

52 جاستاعى ۋحنااگين حۋرەلسۋح بۇعان دەيىن موڭعوليانىڭ پرەمەر-ءمينيسترى بولعان. ول وتكەن جىلى پاندەميا كەزىندە ەلدەگى دەنساۋلىق ساقتاۋ جۇيەسىنە قارسى نارازىلىقتار كەزىندە قىزمەتىنەن كەتتى.

موڭعوليادا وسىمەن سەگىزىنشى رەت پرەزيدەنت سايلاۋى ءوتتى. بۇعان دەيىن سايلاۋ 1993, 1997, 2001, 2005, 2009, 2013, 2017 جىلدارى بولعان.

"The Qazaq Times"