فوتو: maps.google.kz

«جاپون تەڭىزى» مە، الدە «شىعىس تەڭىز» بە؟ جاپونيا جانە وڭتۇستىك كورەيا الدا بولاتىن حالىقارالىق گيدروگرافيالىق ۇيىمىنىڭ (حگۇ/ ءۇاۇ) اسسامبلەياسىندا ورتاعا سالماق.

وڭتۇستىك كورەيا «Yonhap» اگەنتتىگى 23 ءساۋىر كۇنى سول ەلدىڭ سىرتقى ىستەر مينيسترلىگىنىڭ جاريالاعان حابارلاماسىن تاراتتى. وندا XIX كەزەكتى حگۇ اسسامبلەياسى وسى ايدىڭ 24-28 كۇنى ارالىعىندا موناكودا وتەتىندىگى حابارلانعان بولاتىن. جاپون جانە كورەي ەلدەرى ەكى ەل ورتاسىنداعى تەڭىز ماسەلەسىن ورتاعا سالماق. قاتىستى مالىمەتتەرگە سۇيەنسەك، حگۇ بەلگىلەگەن حالىقارالىق ستاندارت «تەڭىز-مۇحيتتاعى شەكارالار» ء(ۇشىنشى رەتكى قارالىم) بويىنشا تەڭىز كارتاسىنىڭ سوڭعى نۇسقاسى 1953 جىلى بەكىتىلگەن. ال، ءتورتىنشى قايتا قاراۋ ناتيجەسى ازىرگە دەيىن كەشىگۋىنىڭ ءبىر سەبەبى، جاپونيا جانە كورەيا اراسىنداعى «شىعىس تەڭىز» ماسەلەسىندەگى كەلىسپەۋشىلىك.

كورەيا سىرتقى ىستەر مينيسترلىگى جاريالاعان مالىمەتتە، وڭتۇستىك كورەيا جاعىنىڭ بۇل ماسەلەدەگى باستى ۇستانىمى – ەكى ەل اراسىنداعى تەڭىزدى «شىعىس تەڭىز» دەپ اتاۋ. الايدا، بۇل شەشىمگە جەتۋ تاكتيكاسىن كەشەۋىلدەتۋى مۇمكىن. ياعني، جاپونيامەن ءبىر بىتىمگە كەلگەنشە «شىعىس جانە جاپون تەڭىزى» دەگەن اتاۋدى قابىلدايدى. ال، بۇل تەڭىز تۋرالى جاپون تانىمى وزگەرمەيدى. ولار جاپون ارالدارى قورشاپ جاتقان بۇل تەڭىزدى «جاپون تەڭىزى» دەپ قانا قابىلدايدى.

وڭتۇستىك كورەيا سىرتقى ىستەر مينيسترىلىگىنىڭ رەسمي وكىلى سوزىندە: «ءبىز بۇل رەتكى اسسامبلەيادا كورەيا مۇددەسىنە ساياتىن اتالعان ماسەلەدە، «شىعىس تەڭىز» اتاۋىن الۋعا تىرىسامىز»، – دەدى. سونىمەن بىرگە رەسمي سەۋل سول ەلدىڭ سىرتقى ىستەر مينيسترلىگى، تەڭىز ىستەرى جانە بالىق شارۋاشىلىعى مينيسترلىگى، قورعانىس مينيسترلىگى تەڭىز ارميا ءبولىمى، مەملەكەتتىك تەڭىز-مۇحيت ىستەرىن زەرتتەۋ ينستيتۋتى، سولتۇستىك-شىعىس ازيا تاريحى قورى قاتارلى 30-دان استام مەكەمەنى جۇمىلدىرىپ، تاريحي ماڭىزعا يە ماسەلەدە ءوز جەڭىسىن قولعا كەلتىرمەك.

ەستەرىڭىزگە سالا كەتەيىك، كورەيا 1997 جىلى اتالعان ۇيىمنىڭ العاشقى جينالىسىندا وسى ماسەلەنى ورتاعا قويعان بولاتىن. الايدا، جاپونيانىڭ باسىمدىلىعىمەن بۇل داۋدا دەگەنىنە جەتە الماي كەلەدى. وسى جولى ەكى ەل 5-ءشى رەت اتالعان تاقىرىپتا پىكىر تالاسقا تۇسكەلى وتىر.

The Qazaq Times