ەۋروپا ديپلوماتياسىنىڭ جەتەكشىسى جوزەپ بوررەل ەۋرووداق ەلدەرىنىڭ اسكەري-تەڭىز كۇشتەرىن تايۆان بۇعازىن كۇزەتۋگە ۇندەدى،-دەپ جازدى ازاتتىق راديوسى.

"تايۆان بىزگە ەكونوميكا، ساۋدا جانە تەحنولوگيا تۇرعىسىنان ماڭىزدى. سول سەبەپتى ەۋروپانىڭ اسكەري-تەڭىز كۇشتەرىن تايۆان بۇعازىن كۇزەتۋگە شاقىرامىن. وسىلايشا ەۋروپانىڭ وسىنداي ماڭىزدى اۋماقتا ءجۇرۋ ەركىندىگىن قولدايتىنىن اشىق كورسەتۋگە ۇندەيمىن" دەپ جازدى بوررەل فرانتسۋزدىڭ Journal du Dimanche باسىلىمىندا جارىق كورگەن شاعىن ماقالاسىندا.

ەكى اپتا بۇرىن قىتاي تايۆان ماڭىندا ءۇش كۇندىك اسكەري جاتتىعۋ وتكىزىپ، "ارالدى قورشاپ، سوققى جاساۋدى" پىسىقتاعان. مۇنداي جاتتىعۋ تايۆان پرەزيدەنتى تساي ينۆەننىڭ اقش-قا ساپارىنان كەيىن باستالدى.

وسى اپتادا 18 ساۋىردە ەۋروپارلامەنتتە قىتايمەن قارىم-قاتىناس تۋرالى سويلەگەن جوزەپ بوررەل بەيبىتشىلىككە كەپىلدىك تۇرعىسىنان العاندا تايۆان ەۋروپا ءۇشىن ماڭىزدى ەكەنىن جەتكىزگەن.

ونىڭ الدىندا فرانتسيا پرەزيدەنتى ەممانۋەل ماكرون "ەۋروپا تايۆانعا بولا اقش پەن قىتاي جانجالىنا ارالاسپاعانى ءجون" دەپ مالىمدەگەن ەدى. جۋىردا پەكيندە بولىپ قايتقان ماكروننىڭ ۇستانىمىن بىرقاتار امەريكالىق جانە ەۋروپالىق ساياساتكەرلەر سىناعان.

تايۆان 1949 جىلى ازاماتتىق سوعىس كەزىندە قىتايدان بولىنگەنىن مالىمدەگەن. بىراق پەكين تايۆان تاۋەلسىزدىگىن مويىندامايدى جانە ونى ءوزىنىڭ پروۆينتسياسى سانايدى. قىتاي كومپارتياسى مەن قىتاي باسشىسى سي تسزينپين "تايۆانمەن بىرىگۋدى" ءوزىنىڭ "تاريحي ميسسياسى" دەپ اتاپ، قاجەت بولعان جاعدايدا اسكەري كۇش قولدانۋعا دايىن ەكەنىن ايتقان. اقش بۇۇ-نىڭ كوپ مەملەكەتى ءتارىزدى تايۆاندى تاۋەلسىز دەپ تانىمايدى، بىراق قىتايدىڭ ونى كۇشتەپ قوسىپ الۋ نيەتىنە قارسى.