وبىرمەن كۇرەس. سكرينينگتەن ءوتۋ ەمدەلۋدىڭ ەڭ دۇرىس جولى

مەديتسينا سالاسىندا ەمىن ءالى تاپپاعان اۋرۋدىڭ ءبىرى قاتەرلى ىسىك. جىل سايىن دۇنيەجۇزى بويىنشا وسى دەرتتەن كوز جۇماتىندار سانى ارتۋدا.
دارىگەرلەردىڭ ايتۋىنشا، بۇعان باستى سەبەپ – ءوز دەنساۋلىعىنا نەمقۇرايلى قاراپ، سكرينينگتىك تەكسەرۋلەردەن وتپەۋ.

سكرينينگتەن وتكىزۋ جۇمىسى باستالعانىنا 10 جىلدان استى. مەملەكەتتىڭ ەسەبىنەن تەگىن پروفيلاكتيكالىق تەكسەرۋدەن وتۋگە بولادى. 40 جاستان اسقان ايەلدەردە ءسۇت بەزى وبىرى مەن جاتىر مويىنى وبىرى كوپ كەزدەسەتىندىكتەن، ولار 2 جىلدا ءبىر رەت تەكسەرىستەن ءوتىپ تۇرۋ كەرەك.

ەر ادامداردا كەزدەسەتىن ونكولوگيالىق اۋرۋ تۇرلەرىنە وكپە وبىرى، قۋىقاستى بەزىنىڭ وبىرى جانە وڭەش وبىرى جاتادى.
50 جاستان 70 جاسقا دەيىنگى ەرلەر مەن ايەلدەر گەموكۋلت-تەستتىڭ كومەگىمەن كولورەكتالدىق وبىردى ەرتە انىقتاۋعا تەكسەرۋدەن وتەدى.

«حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكسكە سۇيەنە وتىرىپ، سكرينينگتىك زەرتتەۋلەردەن ءوتۋ ءۇشىن ءبىر جىل ىشىندە قىزمەتكەرلەرگە 3 جۇمىس كۇنىنە دەيىن الەۋمەتتىك دەمالىس بەرىلەتىنىن بىلە جۇرگەنىڭىز ءجون. ياعني جۇمىس بەرۋشى ءوز قىزمەتكەرىن ونىڭ لاۋازىمى مەن ورتاشا جالاقىسىن ساقتاي وتىرىپ، سكرينينگتەن وتۋگە كەدەرگىسىز بوساتىلادى.

سكرينينگتىك تەكسەرۋ اۋرۋدىڭ باستاپقى كەزەڭىن دەر ۋاقىتىندا انىقتاۋعا ءارى اسقىندىرماۋعا جانە جۇيەلى ەم قابىلداۋعا مۇمكىندىك بەرەدى. وسىلايشا ءومىر ساپاسى مەن ۇزاق ءومىر سۇرۋگە مۇمكىندىك الادى. الايدا ادامدار سكرينگكە شاقىرعاندا كەلمەگەندىكتەن اۋرۋلارى اسقىنىپ، مازالاي باستاعاندا عانا دارىگەرگە جۇگىنەدى. وكىنىشكە وراي ول كەزدە كەش بولادى. سول سەبەپتى ادامداردى قۇتقارۋ دارىگەرلەردىڭ قولىنان كەلمەي قالادى. اۋرۋدىڭ ەرتە انىقتالۋى ادام ءومىرىن ۇزارتۋ ءۇشىن ماڭىزى زور. سوندىقتان ءار ازامات ءوز ءومىرى ءۇشىن، قاۋىپتى دەرتتى اۋىزدىقتاۋ ءۇشىن جىل سايىن سكرينگتەن ءوتىپ، دەر كەزىندە ەم الۋ كەرەك.

ءنۇرباتيما بايتۇرسىن