الماتىلىق دارىگەرلەر قالا اۋماعىنداعى بازارلاردا تەگىن مەديتسينالىق تەكسەرۋ (سكرينينگ) جۇرگىزدى. جەتىسۋ اۋدانىنداعى بازارلاردىڭ بىرىندە جۇمىس ىستەيتىن 5 بىردەي قالا تۇرعىندارىندا قاتەرلى ىسىك انىقتالدى.

مەديتسينالىق تەكسەرۋدەن ساتۋشىلار، جۇك كوتەرۋشىلەر مەن بۋتيك يەلەرى ءوتتى. ولاردىڭ كوبى ارتەريالدىق گيپەرتەنزيا، قانت ديابەتى مەن سەمىزدىك دەرتىنە شالدىققاندارى بەلگىلى بولدى. ارنايى ماماندار بازار ىشىندە تەكسەرىستەن وتۋگە نيەتتى ازاماتتاردىڭ قانىنىڭ قۇرامىنداعى حولەستەرين مەن قانت مولشەرىن ولشەپ، فليۋروگرافيا مەن ەلەكتروكارديوگرامماعا ءتۇسىردى.

جەتىسۋ اۋدانىنىڭ دارىگەرى مايرا ءجۇنىسوۆا: «حالىقتىڭ دەنى ساۋ بولۋى ءۇشىن، جىلىنا ەكى رەت مەديتسينالىق تەكسەرىستەن ءوتىپ وتىرۋ ماڭىزدى. بازار قىزمەتكەرلەرى تىرشىلىك قامىمەن ءجۇرىپ، كوبىنە وسىنداي تەكسەرىستەردەن وزدىگىنەن وتپەيدى. سوندىقتان بۇگىنگىدەي اكتسيالاردى ءجيى ۇيىمداستىرىپ وتىرۋ قاجەت. بۇگىن انىقتالعان بارلىق اۋرۋلاردى تەز ارادا ەمدەۋ ءۇشىن، ناۋقاستارعا ورتالىق ەمحانالارعا جولداما جازىپ بەرىپ، ساۋىعۋ شارالارىن ءجىتى تۇسىندىردىك»، - دەيدى.

ۇيىمداستىرۋشىلار اتالعان اكتسيا الداعى ۋاقىتتا ءداستۇرلى تۇردە جالعاسىن تاباتىنىن جەتكىزدى.

“The Qazaq Times”